Kuri uyu wa Gatatu, tariki ya 27 Nyakanga 2022, mu Ishuri Rikuru ry’Ubumenyingiro rya INES-Ruhengeri habereye umuhango w’Ihererekanyabubasha uzwi nka ‘handover’ mu ndimi z’amahanga, hagati y’Umuyobozi waryo ucyuye igihe Padiri Dr. Fabien Hagenimana n’Umuyobozi Mushya (Vice-Chancellor) Padiri Dr. Jean Bosco Baribeshya.
Uyu muhango wayobowe n’umuyobozi w’Ikirenga wa INES-Ruhengeri Nyiricyubahiro Musenyeri Vincent Harolimana, yashimiye Padiri Dr. Fabien Hagenimana ibikorwa by’iterambere yakoze mu myaka 14 yari amaze muri INES-Ruhengeri harimo imyaka 8 yamaze ayobora iri shuri.
Musenyeri Vincent Harolimana yaboneyeho kandi guha ikaze Umuyobozi mushya, anamwizeza ubufatanye n’umuryango mugari wa INES-Ruhengeri.
Nyiricyubahiro Musenyeri Vincent Harolimana Umuyobozi w’Ikirenga wa INES-Ruhengeri niwe wari uhagarariye uyu muhango
- Advertisement -
Mu ijambo rya Guverineri w’Intara y’Amajyaruguru, Madamu Dancilla Nyirarugero wari muri uwo muhango, yashimiye Nyakubahwa Perezida wa Repubulika y’u Rwanda Paul Kagame, uruhare rwe mu guteza imbere uburezi muri rusange no muri INES-Ruhengeri by’umwihariko.
Yasabye INES-Ruhengeri gukomeza kugira uruhare rufatika mu iterambere ry’abatuye Intara y’Amajyaruguru muri rusange n’abatuye mu karere ka Musanze by’umwihariko, ishaka ibisubizo by’ibibazo bibangamiye abaturage.
Dancilla kandi yanaboneyeho kubizeza gukomeza imikoranire myiza na INES-Ruhengeri hagamijwe gukomeza guteza imbere uburezi kuko ariwo musingi ukomeye w’iterambere rirambye.
Dancilla Nyirarugero, Guverineri w’Intara y’Amajyaruguru
Umuyobozi mushya wa INES-Ruhengeri Padiri Dr. Jean Bosco Baribeshya nawe yijeje ko azakomereza ku byiza byagezweho n’uwo asimbuye, bityo agafatanya n’umuryango mugari wa INES-Ruhengeri n’abafatanyabikorwa banyuranye mu kwihutisha iterambere rya INES-Ruhengeri kurushaho.
INES-Ruhengeri yakinguye imiryango yayo ku wa 17 Ugushyingo 2003, kuri ubu ikaba ifite abanyeshuri basaga 3,650 barimo abanyeshuri baturutse mu bihugu by’amahanga bagera kuri 220.
Abarangije muri iri shuri kuva ryafungura imiryango mu cyiciro cya kabiri cya kaminuza (A0) n’icya gatatu (Masters) bose hamwe kuri ubu bangana n’ibihumbi icyenda na magana abiri mirongo irindwi na barindwi (9,277).
Padiri Dr. Jean Bosco Baribeshya, Umuyobozi Mushya wa INES-Ruhengeri
Padiri Dr. Fabien Hagenimana yashimiwe ibikorwa by’iterambere yakoze mu myaka 14 yari amaze muri INES-Ruhengeri
Padiri Dr. Jean Bosco Baribeshya yahawe ikaze muri INES-Ruhengeri
Uyu muhango wari witabiriwe n’abayobozi b’inzego zitandukanye
Hafashwe ifoto y’urwibutso
