Imfungwa 1,455 zari zifungiye muri gereza ya Kangbayi iri rwa gati mu mujyi wa Beni muri Kivu y’Amajyaruguru, zatorotse mu rukerera rwo kuri uyu wa Kabiri, nyuma y’igitero abitwaje intwaro bayigabyeho.
Amakuru ava mu bayobozi n’abashinzwe umutekano muri Beni, avuga ko icyo gitero cyagabwe n’inyeshyamba zo mu mutwe wa ADF-NALU wo muri Uganda wari ufite abarwanyi bafungiye muri iriya gereza.
Modeste Bakwanamaha Umuyobozi w’Umujyi wa Beni, yabwiye itangazamakuru rikorera muri kariya gace ko inyeshyamba zagabye igitero cy’uruhurirane, kimwe kigabwa kuri gereza ikindi kigabwa ku birindiro by’ingabo zacungaga umutekano w’iriya gereza.
Agira ati, “Habaye igitero cy’uruhurirane kuri gereza ya Kangbayi no ku musozi uyitegeye ingabo zihagararaho kugira ngo ziyigenzure neza.
- Advertisement -
Twahuye n’iki gitero cy’uruhurirane nk’uko mwumvise urusaku rw’amasasu, gusa ku bw’amahirwe make ni uko abagabye igitero baje ku bwinshi banitwaje ibikoresho by’amashanyarazi byo guca imiryango ya gereza, kandi bashoboye gukuramo umuryango imfungwa zose ziratoroka.”
Uyu muyobozi avuga ko inyeshyamba zabasigiye imfungwa zitarenze 110 mu zirenga 1000 zari zifungiye muri iriya gereza.
Sosiyete Sivile yo muri Beni yatangaje ko kugeza Ejo ku wa Mbere tariki ya 19 Ukwakira 2020, gereza ya Kangbayi yari ifungiyewemo imfungwa zirenga 1,500 zirimo abarwanyi b’imitwe ya ADF na Mai-Mai.
Amakuru agezweho kuri ubu, avuga ko mu mfungwa zari ziri muri iriya gereza, 122 zonyine ari zo zanze gusohoka, mu gihe mu zari zatorotse hamaze gufatwa 14, naho ebyiri zikaba zapfuye.
Actualité.cd yavuze ko ziriya mfungwa zacitse, mu gihe hari hamaze igihe hasabwa ko imfungwa ruharwa zavanwa muri iriya gereza iri hafi y’agace zikoreramo ibikorwa byazo byo guhungabanya umutekano, zikimurirwa mu zindi gereza zifite umutekano, nk’iya Angenga muri Equateur.
Si ubwa mbere iriya gereza ya Beni igabwaho igitero imfungwa zigatoroka, kuko muri Kamena 2017, aba Mai-Mai bafatanyije na ADF bayigabyeho igitero bagacikisha imfungwa 930, izindi 11 zikahasiga ubuzima.
