Nyuma y’uko asezeye ku kipe ya Rayon Sports ayimenyesha ko batazakomezanya mu myaka iri imbere, Mazimpaka Andre avuga ko bimwe mu bintu atazibagirwa kuri iyi kipe harimo n’igikombe cya shampiyona yayihesheje.
Mazimpaka Andre wari usoje amasezerano ye muri Rayon Sports y’imyaka 2, ku wa Gatatu w’iki cyumweru ni bwo yasezeye ku bakunzi b’iyi kipe ko atagikomezanyije nayo.
Mu kiganiro n’itangazamakuru, Mazimpaka Andre yavuze ko kimwe mu bintu bitatu atazibagirwa muri iyi kipe harimo igikombe cya shampiyona yahesheje iyi kipe.
Yagize ati, “Ikintu cya mbere ntazibagirwa ni igikombe cya shampiyona natwaranye na yo. Ni ibintu nishimiye nzahora mbyibuka.”
- Advertisement -
Uyu munyezamu yatwaye icyo gikombe mu mwaka w’imikino wa 2019-2020, ashyiraho n’agahigo kuko mu mukino 19 ya shampiyona yakinnye umwaka w’imikino wa 2018-2019, Mazimapaka Andre yabashije gusoza imikino 14 atinjijwe igitego.
Akomeza avuga ko ibindi bintu 2 atazibagirwa ari urukundo yeretswe n’iyi kipe ndetse n’uko bananiwe kumvikana na Rayon Sports ku ngingo yo kongera amasezerano muri iyi kipe.
Yagize ati, “Sinzibagirwa ukuntu twabanye neza. Ni ikipe nziza yamfashije nanjye ndayifasha, urukundo rwayo. Icya nyuma ni uburyo twananiwe kumvikana ngo nongere amasezerano uyu mwaka.”
Mazimpaka Andre kuva yagera muri Rayon Sports muri 2018, yayikiniye imikino 23 akaba yarinjijwe ibitego 7.
