Mu gihugu cya Guinea-conackry abantu 3 bishwe n’icyorezo cya Ebola, abandi barenga 5 bayisangwamo nk’uko bitangazwa n’inzego z’ubuzima.
Iki cyorezo cyakunze kwibasira ahanini ibihugu byo muri Afurika y’Iburasirazuba, mu myaka yo hagati y’umwaka wa 2013 na 2016, abantu barenga 11,000 barapfuye muri Afurika y’Uburengerazuba bishwe na cyo.
Ni mu gihe mu rwego rwo guhangana n’iki cyorezo cya Ebola hakozwe inkingo nyinshi, kuva icyo gihe zikaba zarakoreshejwe no muri Repubulika iharanira Demokarasi ya Congo, igihugu nacyo gikomeje kwibasirwa n’iki cyorezo.
Ebola igera ku bantu iyo bagize aho bahurira bya hafi n’inyamaswa zayanduye, zirimo izo mu muryango w’Inguge, Uducurama n’Impongo (antilopes) zo mu ishyamba cyane ko mu bushakashatsi bwakozwe bugaragaza ko muri izi nyamaswa ziba akenshi zifite Ebola.
- Advertisement -
Iyi ndwara ikwirakwira mu bantu begeranye n’amaraso yanduye, amatembabuzi yo mu mubiri cyangwa mu buryo buziguye ikandurira mu kwegerana ku bantu banduye.
Iyo urebye ku ikarita y’igihugu cya Guinea-conackry, imirambo y’abishwe na Ebola iranduza mu buryo bwihariye.
Dr Sakoba Keïta, ukuriye urwego rw’ubuvuzi muri Guinea-conackry, avuga ko harimo gupimwa abandi bantu ngo harebwe uko ibintu bihagaze mu karere k’Amajyepfo ashyira Uburasirazuba kari hafi y’umujyi wa Nzérékoré aho muri Guinea-conackry.
Avuga ko abakora mu rwego rw’ubuvuzi barimo gushakisha abanduye no kubashyira mu kato hakiri kare kugira ngo badahura n’abandi bakabanduza.
Madamu Matshidiso Moeti, ukuriye igice cy’Afurika mu ishami ry’umuryango w’abibumbye ryita ku buzima (OMS/WHO), yanditse kuri Twitter ko OMS “irimo gukaza ingamba zo kwitegura no kugoboka” kubera ko bishoboka ko Ebola yakongera kwibasira Guinea hatagize igikorwa.
Icyorezo cya Ebola muri Afurika y’uburengerazuba ni cyo cya mbere cyahitanye abantu benshi cyane ku Isi, ugereranyije n’izindi ndwara z’ibyorezo zagiye zihagaragara.
Ese waba uzi Ebola icyo ari cyo?
Ebola ni virus ibanza gutera umuntu guhinda umuriro vuba, agacika intege bikomeye, kuribwa ingingo no kubabara mu muhogo, hagakurikiraho kuruka, guhitwa no kuvira imbere n’inyuma.
Abantu bayanduzwa n’amatembabuzi ayo ari yo yose y’umuntu wayanduye.
Abayirwaye kenshi bicwa n’umwuma, n’ingingo z’imbere mu mubiri zangirika ari nyinshi.
Igihe Ebola imara itaragaragaza ibimenyetso gishobora kuva ku minsi 2 kugeza ku byumweru 3 itagaragara.
Hari hashyize iminsi itari mike mu gihugu cya Repubulika iharanira Demukarasi ya Congo hongeye kuvugwa iki cyorezo cya Ebola, iki cyorezo kikaba cyongeye kuvugwa mu gihe Isi ikomeje guhangana n’icyorezo cya Covid-19 nacyo gikomeje guhitana abatari bake.
