Minisiteri y’ubuzima ya Uganda, kuri uyu wa kabiri tariki 20 Nzeri 2022, yatangaje ko umugabo w’imyaka 24 yapfuye ahitanwe na Ebola.
Jane Aceng, Minisitiri w’Ubuzima wa Uganda, yavuze ko uwo mugabo yamanje kugaragaza ibimenyetso bya Ebola mbere yo kwicwa nayo.
Yagize ati: “Ni umugabo w’imyaka 24 y’amavuko, wari utuye mu gace ka Ngabano, mu Karere ka Mubende. Mbere yo gupfa isuzuma ryo kwa muganga ryagaragaje ko ibimenyetso afite ari ibya Ebola.”
Ishami ry’Umuryango w’Abibumbye ryita ku buzima OMS, ryatangaje ko Ebola yagaragaye muri Uganda, ari iyo mu bwoko bwa Sudan, ikaba yaherukaga kugaragara muri Uganda mu myaka 10 ishize, mu gihe muri 2019 haragaragaye iyo mu bwoko bwa Zaïre.
- Advertisement -
Dr Matshidiso Moeti, umuyobozi wa OMS muri Afurika, yashimiye inzego z’ubuzima za Uganda zabashije gutahura iyi virusi vuba.
Ati: “Turimo gukorana n’inzego z’ubuzima za Uganda, zabashije kubona iyi virusi hakiri kare. Turabashimiye kandi turakomeza ubufatanye mu rwego rwo kumenya inkomoko yayo.”
Ebola ni indwara yandura vuba kandi ikica, mu kuyirinda abantu bakaba bakangurirwa gukaraba intoki kenshi, ndetse bakirinda kwegerana, kuko yandurira mu matembabuzi yavuye ku muntu wayanduye.
