Hakizimana Jean Paul utuye mu mudugudu wa Kansoro, akagari ka Kabeza, umurenge wa Nyange, akarere ka Musanze, Intara y’amajyaruguru, arasaba ubutabera, nyuma y’uko umwana we w’umukobwa witwa Uwiduhaye Solange w’imyaka 16 yasambanijwe ariko ntahabwe ubutabera uko bikwiye.
Ni urubanza nimero RP 00270/2020/TGI/ MUS ruregwamo uwitwa Dushimimana Bonheur w’imyaka 18 mwene Uwihoreye Fidele naTuganijuru Beatrice, utuye mu mudugudu wa Nyabutaka, akagari ka Ninda, umurenge wa Nyange, mu karere ka Musanze.
Muri uru rubanza Dushimimana Bonheur aregwamo gusambanya umwana w’umukowa w’imyaka 16, icyaha bivugwa ko cyakozwe kuwa 19 Werurwe 2020, saa mbiri z’ijoro(20h00), icyaha giteganywa kandi gihanishwa ingingo ya 133 y’itegeko ngenga nimero 68/2018 ryo kuwa 30/08/2018 riteganya ibyaha n’ibihano muri rusange nk’uko ryahinduwe kugeza ubu, agace kayo ka mbere.
Igira iti: “Umuntu wese ukora ku mwana kimwe mu bikorwa bishingiye ku gitsina bikurikira aba akoze icyaha:
- Advertisement -
1.Gushyira igitsina mu gitsina cyangwa mu kanwa k’umwana;
2.Gushyira urugingo urwo arirwo rwose rw’umubiri w’umuntu mu gitsina cyangwa mu kibuno cy’umwana;
3.Gukora ikindi gikorwa cyose ku mubiri w’umwana hagamijwe ishimishamubiri.
Iyo abihamijwe n’urukiko ahanishwa igifungo kitari munsi y’imyaka makumyabiri(20) ariko kitarenze imyaka makumyabiri n’itanu (25).”
Hakizimana Jean Paul avuga ko Dushimimana Bonheur akimara gusambanya uwo mwana w’umukobwa yafashwe n’abari ku irondo, hagakorwa na raporo yaje gushyikirizwa inzego zibishinzwe, harimo n’urwego rw’igihugu rw’ubugenzacyaha (RIB) maze narwo rugakora iperereza ndetse n’ukekwaho gusambanya umwana w’umukobwa arafatwa arafungwa.
Nyuma y’ibyo, ngo hakozwe idosiye ishyikirizwa ubushinjacyaha, nabwo buregera urukiko maze urubanza rucibwa kuwa 12 Gicurasi 2020, Urukiko rwemeza ko nubwo Dushimimana Bonheur yemera ko yakoranye imibonano mpuzabitsina na Uwiduhaye Solange, ariko ngo ibikorwa yakoze atari icyaha cyo gusambanya umwana , kuko ngo nta kigararaza ko Uwiduhaye Solange ari umwana nk’uko ingingo ya 133 y’itegeko nimero 68/2018 yo kuwa 30/08/2018 riteganya ibyaha n’ibihano ibivuga.
Urukiko kandi rwavuze ko hashingiwe ku ngingo ya 111 y’itegeko nimero 027/2019 ryo kuwa 19/09/2019 ryekeye imiburanishirize y’imanza z’inshinjabyaha igira iti: “Gushidikanya birengera ushinjwa. Iyo urubanza rwakurikiranwe mu buryo bwose, ntihagire ibimenyetso nyakuri biboneka byemeza ntashiti abacamanza ko ushinjwa yakoze icyaha koko, bagomba kwemeza ko atsinze.
Aha ngo ni naho urukiko rwahereye ruvuga ko ngo Dushimimana Bonheur adahamwa n’icyaha cyo gusambanya umwana, akaba atagomba no kugihanirwa.
Ubushinjacyaha bwari buhagarariwe na Hagenimana Edouard ntibwishimiye imikirize y’urubanza kuko bwahise bujuririra iki cyemezo mu rukiko rukuru, urugeko rwa Musanze, ubujurire bwatanzwe kuwa 28/05/2020, ikirego ngo kigahabwa nimero RP 00299/2020/TGI/MUS ariko nticyahabwa itariki y’iburanisha.
Ubwo bujurire UMURENGEZI.COM ifitiye Kopi bugira buti, “Ubushinjacyaha ntibwishimiye imikirize y’urubanza maze bwihutira gushaka inyandiko y’amavuko (Acte de naissance ) y’umwana Uwiduhaye Solange igaragaza ko yavutse kuwa 08/01/2004 bivuze ko kuwa 19/03/2020 ubwo Uwiduhaye yakorerwaga icyaha cyo gusambanywa yari afite imyaka 16 y’amauko, bityo ubushinjacyaha bugasaba urukiko kurenganura Uwiduhaye Solange.
Buti, “Turasaba urukiko kwakira ubujurire bw’ubushinjacyaha, kwemeza ko impamvu z’ubujurire zifite ishingiro maze rukemeza ko inyandiko y’ivuka ya Uwiduhaye Solange yakiriwe kandi ko ariyo itegeko riteganya, kwemeza ko imikirizey’urubanza RP 00270/2020/TGI/MUS ihindutse, kwemeza ko Dushimimana Bonheur ahamwa n’icyaha cyo gusambanya umwana no kumuhanisha ibihano byari byasabwe n’ubushinjacyaha mu rukiko rwisumbuye rwa Musanze.”
Uretse ingingo ya 133 y’itegeko ngenga nimero 68/2018 ryo kuwa 30/08/2018 riteganya ibyaha n’ibihano muri rusange, agace kayo ka mbere nk’uko ryahinduwe kugeza ubu, mu mategeko hari n’indi ngingo irengera umwana mu itegeko N°71/2018 ryo kuwa ryo 31/08/2018 ryerekeye kurengera umwana mu ngingo yaryo ya 26 yerekeye kurinda umwana ukurikiranwe mu utabera cyangwa wakorewe icyaha igira iti, “Imibereho bwite y’umwana ukurikiranywe mu butabera cyangwa wakorewe icyaha igomba kubahwa, kurindwa no kurengerwa mu nzego zose z’imikurikiranire yose y’icyaha.
Umwana udafite umwishingizi, Leta niyo imushakira umwunganira mu gihe aburana mu nkiko. Urubanza rw’umwana uvugwa muri iyi ngingo ruburanishwa mu muhezo n’urukiko rubifitiye ububasha.ˮ
Aha, niho abakurikiranira hafi urubanza rwa Uwiragiye Solange bibaza ikibura ngo uyu mwana ahabwe ubutabera nk’uko amategeko abimwemerera cyane ko umubyeyi Hakizimana Jean Paul yagiye kubaza urukiko rukuru, urugereko rwa Musanze rukamubwira ko agomba gutegereza, ngo kuko bakiburanisha imanza zaregewe mu 2019, ibintu abaturage bafata nko kumwikiza.
IRASUBIZA Janvier / Umurengezi.com
