Igihugu cya Kenya, cyabaye icya mbere mu karere mu gukuraho itegeko ryo kwambara agapfukamunwa ahahurira abantu benshi, nyuma y’uko icyorezo cya Covid-19 kigabanyije ubukana muri Afurika n’isi yose muri rusange.
Ibi byatangajwe na Mutahi Kagwe Umunyamabanga w’inama y’igihugu y’ubuzima muri Kenya, kuri uyu wa kane tariki ya 10 Werurwe 2022, ahamya ko kwambara agapfukamunwa ku karubanda (mu mihanda n’ahandi hose hafunguye) byavanyweho, kandi ko gusengera hamwe ku bantu bafashe inkingo byemewe.
Bwana Kagwe yashishikarije Abanyakenya kwambara udupfukamunwa ahantu hafunze, bakanubahiriza amategeko yo gusiga umwanya hagati y’umuntu n’undi, yongeraho kandi ko akato kazahagarikwa.
Ati, “Abanyakenya barashishikarizwa kwambara udupfukamunwa mu gihe bitabiriye ibikorwa bibera mu mazu (ahafunganye). Tugomba noneho gukora igenzura ry’ubushyuhe ahantu hahurira abantu benshi. Ibikorwa bihuriza abantu bose mu mazu bizakomeza kandi bizajya byakira 100% by’ubushobozi bwabyo.”
- Advertisement -
Bwana Kagwe mu kiganiro n’abanyamakuru i Nairobi, yavuze kandi ko ingamba za Covid-19 zabayeho mu myaka ibiri ishize zafashije kandi zikiza abantu ibihumbi.
Ati, “Ingamba zacu dufatanije n’intara zarokoye ubuzima. Dushingiye ku nama za OMS, twari dufite virusi kandi nk’uko mubibona mu kwezi gushize, umubare w’abanduye uri munsi ya rimwe ku ijana. ”
Kubera izi ngamba Leta ya Kenya yafashe, ibikorwa bya siporo bigiye gukomeza abafana basubire ku bibuga batambaye udupfukamunwa.
