Urubanza rwa Idamange Iryamugwiza Yvonne kuri uyu wa Gatatu tariki 12 Gicurasi 2021, rwatangiye kuburanishwa mu mizi n’urukiko rukuru urugereko rwa Nyanza, mu majyepfo y’u Rwanda, mu gihe we yari i Kigali muri gereza ya Nyarugenge ari naho afungiye.
Hifashishijwe ikoranabuhanga ry’amashusho, urukiko rwavuze ko Idamange aregwa ibyaha bitandatu birimo: guteza imvururu muri rubanda, gutanga amakuru y’ibihuha yifashishije ikoranabuhanga no gupfobya Jenoside.
Ahawe umwanya ngo agire icyo abivugaho, Idamange wari wicaranye n’abunganizi be babiri mu cyumba cya gereza ya Nyarugege i Mageragere, yavuze ko atiteguye kuburana.
Yavuze ko mu cyumweru gishize aribwo yamenyeshejwe ko azaburana, ko atashoboye kubonana n’abamwunganira kubera icyo gihe gitoya kandi aregwa ibyaha byinshi.
- Advertisement -
Yavuze ko kandi hari imbogamizi ku kwitabira urubanza i Nyanza kandi afungiye i Kigali, anongeraho ko abatangabuhamya be, umuryango we, n’abashaka gukurikirana urubanza rwe bitaborohera kujya bajya i Nyanza mu rubanza.
Urugereko rw’urukiko rukuru ruburanisha ibyaha byambukiranya imipaka rukorera i Nyanza ari narwo rwahawe uru rubanza, rwavuze ko ruburanishwa gutyo ku mpamvu zo kwirinda Covid-19.
Mu gusubiza, Idamange yavuze ko Covid-19 n’i Nyanza ihari, ndetse avuga ko ashaka kuburana imbonankubone nk’uko biri kugenda mu rubanza rwa Rusesabagina.
Abunganira Idamage, nabo basabye ko urwo rubanza ruba imbonankubone, inteko iruburanisha ikaza i Kigali kuko akarere ka Nyanza kashyizweho ingamba zidasanzwe zo kwirinda Covid-19.
Idamange yavuze ko afite ikibazo cy’umutekano muri gereza afungiyemo, kuko ngo abacungagereza bamubangamira, ndetse ngo hari n’abamubwiye ko basabwe gucisha bugufi Yvonne.
Yavuze ko ibyo bikorwa, kubera ko yamagana amanyanga abera muri gereza, aho yavuze ko imfungwa yemererwa guhamagaza ipaki (pack) y’amafaranga 500frw kuri telefone mu cyumweru, ariko abacungagereza bakagura iya 150Frw gusa. Ati, “Sinshobora kwemera akarengane, ibyo bintu narabivuze niyo mpamvu bakomeza kungendaho.”
Idamange yasabye urukiko ko rumuha amezi abiri kugira ngo ashobore kwiga dosiye ye neza, gusa Ubushinjacyaha ntibwemeranya nawe kuko bwavuze ko guhabwa igihe k’uregwa ari uburenganzira bwe, gusa ko amezi abiri asaba ari igihe kinini, bityo busaba urukiko kureba igihe gikwiriye.
Ubushinjacyaha bwavuze ko uru rubanza ubundi rugomba kuburanishirizwa ku cyicaro cy’uru rukiko i Nyanza, bunenga ibyo kuvuga ko abatangabuhamya byabagora kuko ngo atari urwa mbere rwaba ruhabereye.
Bwanenze kandi kuba uregwa adashaka kuburana hifashishijwe ikoranabuhanga ry’amashusho (vídeo), kandi ngo ari bwo buryo bushoboka bwo kwirinda icyorezo cya Covid-19, buvuga ko ntagikwiye kubuza ko ubu buryo bukoreshwa.
Nyuma yo kumva impande zombi, urukiko rwavuze ko igihe uregwa asaba ari kirekire cyane, rumwemerera igihe kingana n’ukwezi kumwe.
Urukiko rwavuze ko kubera uburemere bw’uru rubanza rutakomeza kuburanishwa ku ikoranabuhanga, keretse habaye imbogamizi zitewe na Covid-19, rwanzura ko urubanza ruzasubukurwa tariki ya 15 Kamena 2021, ku cyicaro cy’uru rukiko i Nyanza kandi ababuranyi bose bari ku rukiko.
Mu cyumba cy’iburanisha aho afungiye, Idamange yari kumwe n’abunganizi be babiri
