Amakuru aturuka muri Ethiopia, avuga ko abantu barenga 40 bishwe cyangwa bagakomerekera mu gitero cy’indege, nyuma y’uko igisirikare cya Ethiopia kirwanira mu kirere kimishe ibisasu ku isoko ryo mu karere ka Tigray kari mu majyaruguru y’iki gihugu.
Ababibonye babwiye BBC dukesha iyi nkuru ko kuwa kabiri igisirikare cya Ethiopia kirwanira mu kirere cyarashe ku mujyi wa Togoga, uri ku ntera ya kilometero 25 uvuye ku murwa mukuru Mekelle wa Tigray.
Igisirikare cya Ethiopia cyahakanye kurasa ku baturage b’abasivile, kivuga ko cyarashe gishaka guca intege abakora iterabwoba.
Bivugwa ko mu minsi ya vuba ishize, inyeshyamba zo mu karere ka Tigray zateye intambwe ku rugamba gusa ibyo byahakanywe na leta ya Ethiopia.
- Advertisement -
Umuryango mpuzamahanga utabara imbabare Croix-Rouge, wavuze ko wafashije mu guhungisha abakomeretse, mu gihe Umuryango w’abibumbye (ONU/UN) wasabye Ethiopia gukora iperereza kuri icyo kivugwa ko ari igitero cy’indege.
Abantu babarirwa mu bihumbi barishwe, naho abandi babarirwa muri za miliyoni bata ingo zabo, nyuma y’uko imirwano yadutse, ubu hashize hafi amezi umunani.
Byagenze gute mu bitero by’indege?
Umuganga ukorera ku bitaro bya Aider, ari na byo bya mbere bikomeye by’i Mekelle, yabwiye BBC ko abantu batari munsi ya 60 bishwe naho abarenga 40 barakomereka. Gusa ngo ubwoba buracyari bwose ko iyo mibare ishobora kwiyongera.
Hanze y’ibitaro bya Aider i Mekelle, Imiryango y’abatuye i Togoga itegererezanye agahinda amakuru y’abo mu miryango yabo
Abaganga bavuga ko barimo kuvura abantu babarirwa muri za mirongo, barimo n’umwana w’imyaka ibiri wakomerekejwe n’igitero cy’indege.
Babwiye kandi ibiro ntaramakuru Reuters ko igisirikare cya Ethiopia cyababujije kugera ahabereye icyo gitero ngo babashe gufasha abasigayeyo.
Umuhungu w’imyaka 16 uri ku bitaro bya Aider yabwiye BBC ko yakubiswe ku kiganza n’igisate cy’igisasu kandi ko yabonye abantu benshi bagwa hasi. Yavuze ko icyo gitero cy’indege cyishe umugabo yari azi nubwo atamutangaje amazina.
Umuvugizi w’igisirikare cya Ethiopia yavuze ko ibyo bitero by’indege byari bigambiriye abitwaje intwaro. Ati, “Nta na rimwe twigeze tugaba igitero cy’indege ku isoko. Ibi byashoboka gute? Igisirikare gishoboye kurasa kidahusha aho kigambiriye. Twagabye ibitero by’indege, ariko gusa ku hantu hamwe na hamwe hagambiriwe.”
Imirwano yatangiye ite?
Leta ya Ethiopia, ifashijwe n’ingabo za Eritrea baturanye, yagabye igitero mu kwezi kwa cumi na kumwe mu 2020 cyo guhirika ishyaka Tigray People’s Liberation Front (TPLF) ryari ku butegetsi muri ako karere. Mu mpera y’uko kwezi, leta ya Ethiopia yatangaje ko yatsinze TPLF.
Igisirikare cya Ethiopia cyafashe umurwa mukuru Mekelle wa Tigray mu kwezi k’Ugushyingo muri 2020
TPLF yari yarashwanye bikomeye na Minisitiri w’intebe wa Ethiopia Abiy Ahmed ku bijyanye n’amavugurura ye muri politiki, ariko kuba TPLF yarafashe ibigo by’ingabo za Ethiopia byo muri Tigray ni byo byabaye imbarutso yo kugabwaho icyo gitero.
Kuva icyo gihe, TPLF ubu yishyize hamwe n’indi mitwe yo muri ako karere bakora ishyaka ry’inyeshyamba ryitwa Tigray Defence Force (TDF).
Aganira na BBC kuwa mbere w’iki cyumweru, nyuma yo gutorwa mu matora rusange yari amaze gusubikwa inshuro ebyiri, Bwana Abiy yavuze ko arimo gukorana n’ingabo za Eritrea baturanye, ngo zishobore gusubira mu gihugu cyazo, ariko avuga ko atazazihatira kugenda.
Izi ngabo za Eritrea, zishinjwa gukora ubwicanyi, gufata abagore ku ngufu mu kivunge, no kubangamira ko imiryango ifasha ishobora gutanga imfashanyo, gusa ibi birego byose Leta ya Eritrea yarabihakanye.
