Perezida Alassane Ouattara wa Côte d’Ivoire yatangaje ko azahatanira manda ya gatatu mu matora ateganyijwe mu kwezi k’Ukwakira 2020.
Mu cyumweru gishize, ishyaka rye ryamugennye nk’umukandida, maze we avuga ko agiye kubitekerezaho akazavuga umwanzuro we nyuma.
Ouattara yagenwe nyuma y’uko uwo ishyaka riri ku butegetsi ryari ryagennye nk’umukandida waryo yari Minisitiri w’intebe Amadou Gon Coulibaly, waje kwitaba Imana azize indwara y’umutima mu kwezi gushize.
Kuri televiziyo y’igihugu, Bwana Ouattara yagize ati: “Ndi umukandida mu matora ya perezida yo kuwa 31 z’ukwezi k’Ukwakira 2020. Nafashe icyemezo cyo gusubiza nemerera ubusabe bw’abaturage.”
- Advertisement -
Hari benshi bagaragaje kunenga iki cyemezo cye kuko itegeko ry’iki gihugu ryemera manda ebyiri z’imyaka itanu gusa ku mukuru w’igihugu.
Hambere, Bwana Ouattara w’imyaka 78, yumvikanye avuga ko ivugururwa ry’itegekonshinga ryabaye muri 2016 rivuze ko manda ze zitangiye bushya, ko bityo manda ye ya mbere itabarwa.
Ibiro ntaramakuru by’Abongereza Reuters bivuga ko ishyaka ritavuga rumwe n’ubutegetsi Front Populaire Ivoirien (FPI) ryatangaje ko iki cyemezo cya Ouattara kibabaje cyane.
Umuvugizi w’iri shyaka Issiaka Sangare yagize ati: “Côte d’Ivoire yari ikwiye gutanga ikimenyetso ko indi demokarasi igiye gukomeza.”
FPI, ishyaka ry’uwahoze ari perezida w’ki gihugu Laurent Gbagbo, kuwa gatandatu w’icyumweru gishize ryo ryatangaje Pascal Affi N’Guessan, wigeze kuba Minisitiri w’intebe, nk’umukandida waryo.
Ibi byarangije ibihuha ko Laurent Gbagbo yaba agiye kugaruka agahatana atanzwe n’iri shyaka.
Bwana Ouattara yatsinze amatora yo muri 2010 ahigitse Laurent Gbagbo, uyu yavanywe mu biro ku ngufu nyuma yo kwanga ibyavuye mu matora, ariko amahanga agashyigikira Ouattara.
Ibi byateje imvururu bivugwa ko zaguyemo abantu bagera ku bihumbi bitatu(3,000) bo ku mpande zari zishyigikiye abategetsi bombi.
