Igihugu cy’Ubushinwa cyashyize ibendera ryacyo ku kwezi, kiba icya kabiri ku Isi nyuma y’imyaka 50 Leta Zunze Ubumwe za Amerika zirishinzeyo ubwa mbere.
Amafoto yashyizwe ahagaragara n’ikigo cy’Ubushinwa gishinzwe iby’ikirere (National Space Administration) yerekana iri bendera ritukura ry’inyenyeri eshanu ririmo rirahungabana ku kwezi.
Aya mafoto yafashwe na kamera y’icyogajuru Chang’e-5 mbere y’uko kiva ku kwezi kuwa kane w’iki cyumweru gitwaye amabuye gikuye ku kwezi.
Abashinwa bari bamaze kugera ku kwezi inshuro ebyiri zose ariko gushingaho iri bendera byarabananiye.
- Advertisement -
Amerika niyo ya mbere yashinze ibendera ku kwezi igihe icyogajuru Apollo 11 cyageragayo mu mwaka w’1969. Kuva icyo gihe, ayandi mabendera atanu niyo yashinzweyo mu gihe cy’imyaka itatu gusa, ni ukuvuga kugeza mu 1972.
Muri 2012 ikigo gishinzwe ikirere cyo muri Amerika(NASA), cyerekanye amafoto kigaragaza ko rimwe muri ayo mabendera atanu ya Amerika rigihungabana, ariko abahanga bavuga ko risa n’iryacuye kubera imirasire y’izuba.
Ubushinwa buvuga iki kuri uru rugendo rwo ku kwezi?
Ikinyamakuru cya Leta y’iki gihugu ‘Global Times’ kivuga ko ibendera ry’Ubushinwa ku kwezi ryibutsa Umunezero udasanzwe waranze Abanyamerika bakoze izi ngendo muri Apollo.
Iri bendera ry’Ubushinwa rifite ubugari bwa metero ebyiri n’uburebure bwa santimetero mirongo icyenda(90cm), ariko rikaba ripima hafi kilogarama imwe(1kg).
Li Yunfeng Uhagarariye ibi bikorwa, yabwiye ‘Global Times’ ko iri bendera ryasizwe ibintu bikenewe kugira rishobore kuririnda imbeho, mu gihe Cheng Chang uhagarariye uwo mugambi avuga ko ibendera risanzwe ritashobora kwihanganira imbeho yo ku kwezi.
Uru rugendo rw’icyogajuru Chang’e-5 ku kwezi rubaye urwa gatatu rw’Ubushinwa rugenze neza mu gihe cy’imyaka irindwi.
Ndumiwe