Abaturage bo mu murenge wa Gahunga, bavuga ko ubuyobozi bw’umurenge bukoresha imbaraga z’umurengera mu iyubahirizwa ry’amabwiriza ya COVID-19, aho ngo bubamenera ibigage bukabaca amande, bukabafunga ndetse bukanatwara ibikoresho bifashisha mu kwenga, ari naho bahera basaba ko basubizwa ibikoresho byabo, kandi mu guhanwa hagakurikizwa amabwiriza.
Aba baturage bavuga ko ubuyobozi bw’uyu murenge bwabameneye ibigage bari basanzwe benga, buvuga ko binyuranyije n’amabwiriza yo kwirinda COVID-19, nyamara ibihano bahawe bikaba bihabanye n’ibyashyizweho na Leta.
Ntamuheza Jean Damascene umwe muri aba baturage, avuga ko bamumeneye ibigage bifite agaciro k’amafaranga asaga ibihumbi Magana abiri y’u Rwanda, yongeraho ko amande bamuciye atariyo banditse ku nyemezabwishyu(facture) yahawe.
Ati, “Ibyanjye babimennye mu kwezi kwa 12 mu mwaka ushize wa 2020, bavuga ko twarenze ku mabwiriza yo kwirinda Coronavirus, batwaye ibikoresho nashigishiragamo banafunga uwo nengeraga iwe witwa Hakizimana Emmanuel. Bamurekuye ari uko ntanze ibihumbi mirongo irindwi na bitanu(75,000 Frw), ariko ikibazo gihari ni uko kuri gitansi banditseho ibihumbi icumi(10,000Frw) gusa!”
- Advertisement -
Inyemezabwishyu yahawe Hakizimana Emmanuel yanditsweho ibihumbi 10 kandi harishyuwe 75,000 Frw
Si Ntamuheza gusa wahuye n’iki kibazo, kuko hari na Maniriho Emmanuel ndetse na Ngendahimana Athanasie bavuga ko bamenewe ibigage muri Gashyantare 2021, kandi bari basanzwe benga ibigage by’umwimerere byengerwa ahazwi nko mu Gahunga k’abarashi, ariko ngo ubuyobozi bukaza kubimena buvuga ko batubahiriza amabwiriza yo kwirinda no gukumira ikwirakwira rya COVID-19.
Ngendahimana Athanase agira ati, “Usibye kuba barameneye ibigage, banamennye ibiryo umugore wanjye yari atetse. Umugore wanjye baramufunze ntanga ibihumbi 100, nyuma Komanda aravuga ngo ngomba gutanga ibihumbi 200 bitaba ibyo bakamujyana mu nzererezi. Nahamagaye DPC babona kumurekura, ariko nibajije ukuntu umugore wanjye barikumujyana mu nzererezi kandi baramukuye mu rugo!”
Aba baturage bavuga ko kubamenera ibigage no kubatwarira ibikoresho atariwo muti, ahubwo ko inzego zibishinzwe zakabaciye amande agenwa n’amategeko. Bakaba basaba ubu buyobozi kubasubiza ibikoresho byabo kuko bitabura ikindi bimara, dore ko ngo batizeye niba bitaranagurishijwe.
Mukamusoni Jeanne d’Arc Umunyamabanga Nshingwabikorwa w’umurenge wa Gahunga avuga ko ibyamenwe ari ibitujuje ubuziranenge bizwi nk’ibikorano. Ati, “Uwo twasangaga ari ibigage bisanzwe twaramwihanangirizaga, ibyo twamenaga ni ibikorano biri mu rwego rwa kanyanga. Gutwara ibikoresho biri mu myanzuro y’Inama y’umutekano y’akarere kugira ngo bacibwe intege.”
Tumubajije niba ubuyobozi budashobora kwibeshya ku bikorano bukamena n’ibitari ibikorano, yavuze ko amakuru bayahabwa n’abaturage kuko ngo bo batazi gupima ibikorano n’ibitari byo. Ati, “Twe ntituzi ibikorano n’ibitari ibikorano, ni amakuru duhabwa. Gusa na none bakwiriye no kubahiriza amabwiriza. COVID-19 nigenza make ibikoresho byabo bazabisubizwa.”
Umwe mu baturage batuye muri uyu murenge waganiriye n’itangazamakuru ariko ntiyifuze ko amazina ye atangazwa ku mpamvu z’umutekano we, avuga ko kuba ubuyobozi bwita ibi bigage ibikorano atari byo, ngo kuko na mbere ya COVID-19 bari basanzwe benga mu buryo buzwi, bikiyongeraho ko inyemezabwishyu UMURENGEZI ufitiye kopi, igaragaza ko amande yaciwe ari ayo kurenga ku mabwiriza yo kwirinda COVID-19, aho kuba ayo kwenga inzoga z’inkorano.
Ubwo UMURENGEZI.COM wavugishaga umuyobozi w’Akarere ka Burera Uwanyirigira Marie Chantal wifuje kumenya niba iki kibazo kizwi n’akarere ndetse n’impamvu abantu bafite amakosa amwe bahabwa ibihano bitandukanye bagacibwa n’amande atangana, maze adutangariza ko nta makuru afite kuri iki kibazo.
Uwanyirigira Marie Chantal Umuyobozi w’Akarere ka Burera
Ati, “Nta makuru mfite kuri iki kibazo, ndaza kugikurikirana. Cyaba ari ikibazo abaturage baciwe amande atangana, abayaciwe baba bagomba kutumenyesha tugakurikirana, ndetse n’umuyobozi uciye amande anyuranyije n’ayagenwe nawe aba akwiriye guhanwa. Gusa na none Abaturage bakwiriye kumva ko turi mu bihe bidasanzwe bakadufasha gushyira mu bikorwa ingamaba.”
Uyu muyobozi kandi asaba abayobozi b’inzego z’ibanze kujya begera abaturage bakabaganiriza mu rwego rwo kunoza imikoranire. Ati, “Tuributsa abayobozi ko icyo bakwiriye gushyiramo imbaraga atari uguhana abaturage, iyo twabegereye nabo barabyumva tugafatanya.”
Si ubwa mbere imenwa ry’ibigage rivuzwe muri uyu murenge wa Gahunga n’indi mirenge itandukanye igize akarere ka Burera, gusa kuri ubu ngo harimo igisa n’akarengane ari naho aba baturage bahera basaba kurenganurwa.
