Leta zunze ubumwe za Amerika kuri uyu wa gatatu tariki ya 22 Ukuboza 2021, yemeye ikoreshwa ry’ikinini cya Paxlovid cyakozwe n’ikigo Pfizer nk’umuti wa Covid-19 ndetse itegeka ko gitangira guhabwa abanduye ako gakoko.
Ibi bitangajwe mu gihe ubwoko bushya bwa Covid-19 yihinduranyije buzwi nka Omicron bwateye ubwoba Leta ya Amerika muri ibi bihe by’iminsi mikuru isoza umwaka wa 2021.
Icyo kinini cya Paxlovid, cyahawe uburenganzira bwo kuba gikoreshwa mu buryo bwihuse n’ikigo cya Leta gishinzwe ibiribwa n’imiti (FDA), kikaba cyaremejwe nyuma y’igeragezwa ryacyo ryerekanye ko kigabanya abantu binjira ibitaro hamwe n’abapfa ku kigero cya 88%.
Perezida Joe Biden yavuze ko agiye gushyiraho itegeko rizafasha ikigo Pfizer kugira ngo cyihutishe igikorwa cyo kongera ibyo binini. Ikigo FDA kivuga ko iki kinini kitaje gukuraho inkingo za Covid-19, ahubwo kije kuzunganira.
- Advertisement -
Ikigo cy’Ubumwe bw’Ubulayi gishinzwe kugenzura imiti mu cyumweru gishize, cyemereye ibihugu byo muri uyo muryango gukoresha icyo kinini cya Pfizer mbere y’uko inzego zibishinzwe kicyemeza.
