Derek Chauvin, wahoze ari umupolisi, yahamwe n’icyaha cyo kwica umwirabura George Floyd mu mujyi wa Minneapolis, muri Leta Zunze Ubumwe za Amerika mu mwaka ushize wa 2020
Derek yahamijwe ibyaha bitatu bijanye no kwica, yari yarezwe muri uru rubanza rwakurikiranywe n’abatari bake.
Mu isomwa ry’uru rubanza ryabaye kuri uyu wa kabiri tariki 20 Mata 2021, humvikanye induru n’impundu hanze y’urukiko, nyuma y’uko umucamanza yasomaga ibyagezweho n’abanyagihugu bumviriza bagaca urubanza (jury) nk’uko bigenda mu manza muri Amerika.
Abagize jury, byabatwaye igihe kitageze ku munsi, kugira ngo bahamye icyaha Derek Chauvin, ku birego byose bitatu bijanye n’urupfu rwa George Floyd.
- Advertisement -
Derek yafashwe videwo mu kwezi kwa Gicurasi 2020, yashize ivi ku ijosi rya Floyd, igihe kigera ku minota icyenda, ubwo yarimo amufata icyo gihe, bikaza kumuviramo urupfu.
Umucamanza yari yabwiye abagize Jury gushakisha ibimenyetso byose, ndetse bakamenya ko igikorwa cyo kuzana ibimenyetso byose kitareba ababuranira uregwa, ahubwo kireba Leta.
Ababuranira Chauvin bari bireguye bavuga ko ibiyobyabwenge n’ubuzima butifashe neza ari byo byatumye Floyd apfa.
Ubushinjacaha bwasabye abagize jury kwemeza ibyo babonye muri videwo, maze bose babyemeza nta kujijinganya.
Iyo videwo yanarebwe hafi n’isi yose, yababaje benshi ndetse binatuma habaho kwigaragambya basaba guhagarika irondaruhu no gukoresha imbaraga z’umurengera bikunze kuranga abapolisi.
Umucamanza yatangaje ko Derek Chauvin w’imyaka 45 azosomerwa igihano cye mu byumweru umunani biri imbere, ahita yambwikwa amapingu ajyanwa muri gereza.
Ni ubwa mbere mu mateka ya Leta ya Minnesota, umupolisi w’umuzungu ahamwa n’icyaha cyo kwica umwirabura yafashe, nk’uko bivugwa n’ishyirahamwe riharanira uburenganzira bw’ikiremwa muntu muri Amerika(American Civil Liberties Union).
Src : BBC
