Perezida wa Leta Zunze Ubumwe za Amerika Donald Trump yatangaje ko we n’umugore we Melania Trump babasanzemo Coronavirus kandi ko ubu bagiye mu kato.
Trump w’imyaka 74 yatangaje aya makuru abinyujije ku rukuta rwe rwa Twitter, aho yagize ati, “Ibi tuzabivamo hamwe.”
Ibi bibaye nyuma y’uko bamwe mu bakorana nawe bya hafi babasanzemo iki cyorezo.
Hope Hicks, umujyanama we w’imyaka 31, niwe muntu wa hafi cyane bakorana baheruka gusangamo Coronavirus.
- Advertisement -
Madamu Hicks yajyanye nawe mu ndege ya ‘Air Force One’ ubwo muri iki cyumweru yari agiye mu kiganiro mpaka cyabereye muri Leta ya Ohio.
Sean Conley, umuganga wa Perezida Trump yasohoye itangazo rivuga ko Perezida n’umugore we, bombi ubu bameze neza kandi ko bagiye kuguma mu rugo muri White House kugira ngo bakire.
Iri tangazo rikomeza rivuga ko uyu muganga yizeye ko Perezida ari bukomeze gukora inshingano ze nta kirogoya mu gihe ari gukira, kandi ko azakomeza gutang amakuru y’uko bizaba bimeze.
Mu kiganiro kuri telephone kuri Fox News kuwa kane nijoro, Perezida Trump yavuze ko we na Melania bamara igihe kinini bari kumwe na Hope.
Ubusanzwe, buri munsi ibiro bya White House bisuzuma uwundi muntu wese uba uri bubonane na Perezida.
Kuwa kane nijoro, Trump yari yavuze ko we n’umugore we w’imyaka 50, bagiye kwishyira mu kato nyuma y’uko Madamu Hope bamusanzemo iyi ndwara.
Yari yanditse nabwo kuri Twitter ati, “Hope Hicks umaze igihe akora cyane ataruhuka na gato, bamusanzemo Covid-19. Birakomeye! First Lady nanjye dutegereje ibisubizo, hagati aho turaba dutangiye kujya mu kato!
Trump yiyonyeye ku bandi bayobozi bakomeye barimo Minisirtiri w’intebe w’u Bwongereza Boris Johnson na Perezida Jair Bolsonaro wa Brazil banduye Coronvirus mu ntangiriro z’uyu mwaka ariko bakaza kuyikira.”
