Umuririmbyi w’umunyarwanda Itahiwacu Bruce wamamaye mu izina rya Bruce Melodie, afungishijwe ijisho mu Burundi, mu gihe inzego z’umutekano zigikora iperereza ku cyaha cy’ubwambuzi bushukana akurikiranyweho.
Ku gicamunsi cyo kuri uyu wa Gatatu tariki 31 Kanama 2022, ni bwo Bruce Melodie yageze mu Mujyi wa Bujumbura mu Burundi, aho afite ibitaramo bibiri.
Nyuma yo kuganira n’itangazamakuru, Polisi yamutaye muri yombi nyuma yo kwakira ikirego cy’umunyemari Toussaint, umushinja kumuhombya mu gitaramo yari yamutumiyemo mu mwaka ushize.
Ibinyamakuru bitandukanye byo mu Burundi, byatangaje ko Bruce Melodie yahaswe ibibazo kuri sitasiyo ya Polisi i Nyamiramabi, muri karitsiye y’agace kitwa Bwiza, amara nibura mu gihe cy’amasaha atatu yisobanura ku byo ashinjwa.
- Advertisement -
Yahaswe ibyo bibazo, mu gihe abanyamakuru bari bamutegereje mu kiganiro cyari kubera ahitwa Zion Beach. Ni ikiganiro byari byitezwe ko agaruka ku bitaramo bibiri agomba gukorera mu Burundi ku wa 2-3 Nzeri 2022.
Toussaint ushinja Bruce Melodie ubwambuzi, asanzwe ari umwe mu bategura ibitaramo bikomeye mu gihugu cy’u Burundi.
Uyu mugabo yavuze ko Bruce Melodie amufitiye amadorali 2000$ [2,000,000 Frw], yamuhaye ubwo yari yamutumiye mu gitaramo umwaka ushize, ariko Leta y’u Burundi ikaza kugihagarika, ivuga ko ari mu rwego rwo kwirinda Covid-19.
Toussaint anavuga ko yishyuza Bruce Melodie miliyoni 30 z’amafaranga y’amarundi [Arangana na 15, 161, 384.94 Frw] yakoresheje amutegurira igitaramo cye mu Burundi, akaba yarayahombye.
Ijwi ry’Amerika ryanditse ko mu kwisobanura, Bruce Melodie yavuze ko abari bashinzwe kureberera inyungu ze bahindutse, kandi ko amafaranga Toussaint avuga atayazi.
Bruce Melodie ati, “Management yanjye yarahindutse! Ayo mafaranga avuga sinzi uko yayatanze, kugira ngo tworoshye ibintu, turashobora kumwishyura ayo madorali 2000, ariko izo miliyoni 30 ntazo twiteguye gutanga.”
Umwe mu bayobozi muri Minisiteri y’Umutekno n’Iterambere ry’Abarundi, yabwiye Ijwi ry’Amerika, ko ibitaramo bya Bruce Melodie bitakibaye. Ati, “Nta gitaramo na kimwe azakora kuko arafunzwe.”
Mu ijoro ryo kuri uyu wa Gatatu tariki 31 Kanama 2022, Minisiteri y’Umutekano n’Iterambere ry’Abarundi, yanditse kuri Twitter ivuga ko Bruce Melodie afunzwe ‘akekwaho ubwambuzi bushukana’.
