Afurika Yunze Ubumwe (African Union -AU), igiye gufasha ibihugu bigize umuryango wa Afurika y’i Burasirazuba (EAC) ibiha inkingo (doze) za COVID-19 miliyoni 35.
U Rwanda ubu rufite umubare w’abamaze kwandura Covid-19 n’abo ihitana ukomeje kwiyongera, kuko abayanduye barenga ibihumbi 10 mu gihe abo yahitanye ari 128, ruri mu bihugu bizahabwa izo nkingo.
Biteganyijwe ko u Rwanda ruzahabwa doze miliyoni 2 n’ibihumbi 600 mu gihe u Burundi na Sudani y’Epfo buri gihugu kizahabwa doze miliyoni 2 n’ibihumbi 300.
Kenya izahabwa doze miliyoni 10 n’ibihumbi 800, Tanzania izahabwa doze zisaga miliyoni 12, Uganda ihabwe miliyoni 9 n’ibihumbi 100. Ethiopia yo izahabwa miliyoni 23 n’ibihumbi 100, mu gihe Somalia izagenerwa doze miliyoni 3 n’ibihumbi 200.
- Advertisement -
Umuyobozi wa Afurika Yunze ubumwe, Cyril Ramaphosa, unayobora igihugu cya Afurika y’Epfo, kuwa Gatatu yatangaje ko bateganya gutanga doze miliyoni 270 z’uru rukingo ku bihugu bya Afurika, gusa ngo izigera kuri miliyoni 50 zikazaboneka hagatu ya Mata na Kamena 2021.
Izi nkingo ni iz’uruganda Pfizer, AstraZeneca zifite ibirango by’ikigo cyo mu Buhinde (Serum Institute of India) na Johnson & Johnson nkuko tubikesha the East African.
Sosiyete Pfizer izagenera Afurika doze miliyoni 50, mu gihe Johnson & Johnson izatanga izigera kuri miliyoni 120, hanyuma AstraZeneca izatanga doze miliyoni 100. Zikazatangwa bitarenze mu mpera za Werurwe uyu mwaka.
Perezida Ramaphosa avuga ko hariho gahunda yo gufasha ibihugu bikennye kubona uru rukingo ku bufatanye bw’ishami rya Loni ryita ku buzima (OMS) Gavi Vaccine Alliance initiative.
Afurika ifite gahunda yo gukingira abayituye 60% ni ukuvuga abasaga miliyoni 780 ku bayituye basaga miliyari 1 na miliyoni 300 mu rwego rwo kugira ngo imibiri y’abayituye igire ubudahangarwa bwo guhangana n’iyi ndwara.
Ni ukuvuga ko hakenewe doze zisaga miliyari na miliyoni 500, buri muturage akagenerwa doze ebyiri. Izo doze zisaba miliyari 10 z’amadolari ya Amerika, angana na miliyari hafi ibihumbi 10 (10.000.000.000.000 Frw) mu mafaranga y’u Rwanda.
U Rwanda ruri mu myiteguro yo guhabwa uru rukingo, rwaguze ibyuma bikonjesha (Frigo) bifite ubushobozi bwo kubika ubwoko bwose bw’inkingo za COVID-19 zimaze gukorwa n’ibihugu binyuranye, ndetse no muri iyi minsi rukaba rwaraguze ibindi 5 byatwaye asaga miliyoni 50 FRW nkuko byemezwa n’Ikigo cy’Igihugu cy’Ubuzima (RBC).
Ibi byuma bije byiyongera ku bindi u Rwanda rwari rusanzwe rukoresha mu kubika neza inkingo ngo zitangirika, gusa byo bikagira umwihariko w’uko bishobora kuzikonjesha ku kigero cya dogere -40 na -86.
Kugeza ubu abatuye Afurika basaga miliyoni eshatu bamaze kwandura iki cyorezo, abagera ku 72,805 cyarabahitanye, Afurika y’epfo ikaba ari nayo iza ku isonga mu bifite umubare munini w’abanduye kuko yihariye abagera kuri 1,231,597, mu gihe abasaga 33,163 bari ku ijanisha rya 57.4% imaze kubahitana.
