Kuri uyu wa gatatu, tariki ya 16 Nzeri 2020, ubushinjacyaha bwongeye gusaba urukiko rukuru, urugereko rwa Musanze ko uwari Gitifu wa Cyuve Sebashotsi Gasasira Jean Paul na bagenzi be Tuyisabimana Jean Léonidas, abadaso(DASSO) babiri aribo Nsabimana Anaclet na Abiyingomana Nsanzumuhire Sylivan baburanishwa n’urukiko rwisumbuye.
Ni urubanza rwajuririwe n’ubushinjacyaha mu rukiko rukuru, urugereko rwa Musanze nyuma y’aho urukiko rwisumbuye rwari rwafashe icyemezo cyo kwiyambura ububasha bwo kuburanisha urubanza Sebashotsi Jean Paul na bagenzi be Tuyisabimana Jean Léonidas, Nsabimana Anaclet na Abiyingoma Nsanzumuhire Sylivan baregwamo icyaha cyo gukubita no gukomeretsa ku bushake Nyirangaruye Clarisse na musaza we Manishimwe Jean Baptiste.
Icyemezo cy’urukiko rwisumbuye cyo kwiyambura ububasha cyari cyafashwe kuwa 30 Nyakanga 2020, aho urukiko rwavuze ko rushingiye ku ngingo ya 121, agace kayo ka 1 y’itegeko nomero 68/2018 ryo kuwa 30/08/2018 riteganya ibyaha n’ibihano muri rusange ndetse ngo runashingiye kandi ku nyandiko ya muganga ( Expertise Médico-Légale) yo kuwa 14/05/2020 ndetse rugashingira ku ngingo ya 4 y’itegeko ry’ibimenyetso n’itangwa ryabyo ndetse n’ingingo ya 18 y’itegeko ry’imiburanishirize y’imanza z’inshinjabyaha nomero 027/2019 ryo kuwa 19/09/2019; rwavuze ko rwiyambuye ububasha bwo kuburanisha uru rubanza ahubwo ko rwakoherezwa mu rukiko rw’ibanze rwa Muhoza.
Aha, niho ubushinjacyaha bwari buhagarariwe na Bugirande Museruka John butishimiye uyu mwanzuro w’urukiko maze bukawujuririra mu rukiko rukuru, urugereko rwa Musanze.
- Advertisement -
Mu iburanisha ry’ubu bujurire mu rukiko rukuru, urugereko rwa Musanze, urukiko rwahaye umwanya ubushinjacyaha ngo busobanure impamvu y’ubujurire bwabwo maze mu ijwi rya Gakwerere Javan waruhagarariye ubushinjacyaha asobanura izo mpamvu agira ati, “Ubushinjacyaha bwajuriye kubera ko butishimiye umwanzuro wafashwe n’urukiko rwisumbuye rwa Musanze kuwa 30/07/2020, aho rwavuze ko rwiyambuye ububasha kandi icyaha Sebashotsi Gasasira Jean Paul na bagenzi be baregwa icyaha gihanishwa igifungo kitari munsi y’imyaka 10 ariko kitarengeje 15”
Nk’uko bigaragara mu ngingo 121, agace kayo ka 3 y’itegeko nomero 68/2018 ryo kuwa 30/08/2018 riteganya ibyaha n’ibihano muri rusange igira iti, “Iyo gukubita cyangwa gukomeretsa byateye indwara cyangwa kudashobora kugira icyo umuntu yikorera ku buryo budahoraho, igihano kiba igifungo kitari munsi y’imyaka icumi (10) ariko kitarenze imyaka cumi n’itanu (15) n’ihazabu y’amafaranga y’u Rwanda atari munsi ya miliyoni eshatu (3.000.000 FRW) ariko atarenze miliyoni eshanu (5.000.000 FRW).”
Bityo, ubushinjacyaha busaba urukiko rukuru, urugereko rwa Musanze ko rutaha agaciro icyo cyemezo cy’urukiko rwisumbuye rwa Musanze kuko rwirengagije amategeko ndetse n’ibimenyetso biri muri Dosiye, ahubwo ko rwategeka ko Sebashotsi Gasasira Jean Paul, Tuyisabimana Jean Léonidas, Nsabimana Anaclet na Abiyingoma Nsanzumuhire Sylivan baburanishwa n’urukiko rwisumbuye ku rwego rwa mbere hatitawe ku ngingo ya 121, agace kayo ka 1 abaregwa n’abunganizi babo bashingiraho.
Igira iti, “Gukubita cyangwa gukomeretsa ku bushake Umuntu wese, abishaka, ukomeretsa undi, umukubita cyangwa umusagarira ku buryo bwa kiboko bubabaje aba akoze icyaha. Iyo abihamijwe n’urukiko, ahanishwa igifungo kitari munsi y’imyaka itatu (3) ariko kitarenze imyaka itanu (5) n’ihazabu y’amafaranga y’u Rwanda atari munsi y’ibihumbi magana atanu (500.000 FRW) ariko atarenze miliyoni imwe (1.000.000 FRW).”
Ni mu gihe abaregwa bose mu mpuzankano y’iroza (Imyambaro y’abafungwa) bari kumwe n’abunganizi babo mu mategeko Me Kamanzi Cyiza Bénjamin, Me Habiyakare Emmanuel na Me Bayingana Janvier basabye urukiko ko rwaha agaciro icyemezo cy’urukiko rwisumbuye rwa Musanze abaregwa bakazaburanira mu rukiko rw’ibanze rwa Muhoza.
Urukiko rwabajije abunganizi b’abaregwa impamvu bashingiraho bavuga ko icyemezo cy’urukiko rwisumbuye cyahabwa agaciro maze bavuga ko icyo cyemezo cyafashwe bikurikije amategeko cyane ko ngo raporo ya muganga yo kuwa 14/05/2020 ntacyo isobanuye kandi ko ngo ububasha bw’urukiko budashingira kuri raporo ahubwo bushingira ku bihano.
Uwunganira abaregera indishyi muri uru rubanza , Me Munyarugero Gaspard ahawe ijambo n’urukiko, yunze mu ry’ubushinjacyaha avuga ko Nyirangaruye Clarisse yagize uburwayi budahoraho nk’uko itegeko ribivuga.
Ati, “Ubu Nyirangaruye Clarisse yarorohewe ariko akimara gukubitwa yagize ububabare budahoraho ariko kuba yarajyanwe mu bitaro hari imirimo myinshi atikoreye icyo gihe ubwo yitabwagaho n’abaganga. Ikindi nk’abaregera indishyi, turifuza ko n’akarere kazagira uruhare mu gutanga indishyi kuko abakoreye icyaha Nyirangaruye Clarisse bari abakozi b’akarere kabone n’ubwo bo bagomba guhanirwa icyaha bakoze.”
Urukiko rumaze kumva impande zombi, rwongeye guha umwanya ababuranyi bose ngo bagire icyo bongera kubyo bavuze maze ubushinjacyaha bwari buhagarariwe na Gakwerere Javan bwongera gushimangira amagambo ari mu itegeko agira ati, “Gukomeretsa byateye indwara cyangwa kudashobora kugira icyo umuntu yikorera ku buryo budahoraho, igihano kiba igifungo kitari munsi y’imyaka icumi (10) ariko kitarenze imyaka cumi n’itanu (15)…….”
Urubanza rwatangiye saa mbiri n’igice (8h30′) za mu gitondo maze rupfundikirwa ku isaha ya saa yine n’igice (10h30′), ababuranyi bose bamenyeshwa n’inteko y’abacamanza ko ruzasomwa kuwa 06 Ukwakira 2020 saa munani (14h00) z’amanywa.
