Urukiko rw’Ibanze rwa Gasabo kuri uyu wa kabiri tariki ya 21 Gashyantare 2020 rwategetse ko Dr. Pierre Damien Habumuremyi wabaye Minisitiri w’Intebe afungwa iminsi 30 y’agateganyo mu gihe iperereza rigikomeje ku cyaha akurikiranyweho cyo gutanga sheki zitazigamiye zifite agaciro ka miliyoni zirenga Ijana na mirongo irindwi(170.000.000Frw) z’amafaranga y’u Rwanda.
Isomwa ry’uru rubanza ryabaye uregwa adahari, gusa umwe mu bamwunganira mu mategeko Me Kayitare Jean Pierre yari mu rukiko.
Urukiko rwavuze ko uregwa aramutse arekuwe akaburana ari hanze nkuko yari yabisabye, ashobora kubangamira iperereza rigikomeje, kandi ko nk’umuntu umenyereye inzego z’ubuyobozi, byamworohera gusibanganya ibimenyetso.
Ubwo Dr. Pierre Damien Habumuremyi yagezwaga mu rukiko bwa mbere tariki ya 16 Nyakanga 2020, yahakanye ibyaha byose aregwa avuga ko atakabaye afungwa kuko bitashoboka ko akemura ibibazo afitanye n’abaturage mu gihe afunze.
- Advertisement -
Uregwa yari yasabye ko yaburana adafunze kuko atari umuntu watoroka kandi ko afitiwe icyizere na Leta y’u Rwanda.
Dr. Habumuremyi wigeze kuba Minisitiri w’Intebe, akurikiranyweho ibyaha bishingiye kuri Kaminuza ye yitwa Christian University of Rwanda ikorera mu Mujyi wa Kigali ahazwi nka St. Paul, ndetse iyi kaminuza ikaba iherutse no kwamburwa uburenganzira bwo gukora na Minisiteri y’Uburezi.
Dr. Pierre Damien Habumuremyi kuri ubu ni umuyobozi w’Urwego rw’Igihugu Rushinzwe Imidari, Impeta n’imidende.
