DRC: M23 yafashe agace ka Ntamugenga

Abarwanyi b’umutwe wa M23 utavuga rumwe n’ubutegetsi bwa Repubulika Iharanira Demukarasi ya Congo(DRC) baraye bafashe agace ka Ntamugenga, mu mirwano ikomeye, abaturage benshi bahungira muri Uganda.

Amakuru dukesha ikinyamakuru DRC Actu cyandikirwa i Goma mu Burasirazuba bwa Congo, aremeza ko abarwanyi ba M23 bafashe aka gace, ndetse n’utundi twa Muhimbira na Nyaluhondo, kandi imirwano ikaba igikomeje.

Aka gace ka Ntamugenga, ni inzira ya hafi yerekeza mu mujyi wa Goma, aho bitekerezwa ko M23 ishobora gusatira mu bihe bya vuba, ikagerageza kuhafata nk’uko byigeze kubaho mu kwezi k’Ukuboza 2012.

Iyi mirwano ya M23 n’ingabo za Congo (FARDC) yongeye kubyutsa ubukana, guhera ku mugoroba wo kuwa Kane w’icyumweru gishize, aho buri ruhande rwavuze ko atari rwo rwatangije intambara, ibintu byafashwe nko kwitana ba mwana.

FARDC ivuga ko abatangije intambara ari M23, uyu mutwe na wo ukavuga ko ingabo za Leta zifatanyije n’imitwe ya FDLR na Mai Mai zabagabyeho igitero, na bo bakirwanaho.

Igisirikare cya DRC kivuga ko gihagaze neza ku rugamba, cyaraye gitangaje ko imirwano ikomeye yabaye kuwa Gatandatu no Ku Cyumweru, yaguyemo Abasivili bane.

Ku rukuta rwa Twitter, OCHA, ishami ry’umuryango w’abibumbye rishinzwe kugenzura itangwa ry’imfashanyo, ryavuze ko abantu benshi bamaze guhungira muri Uganda, bityo ko hari kubarurwa umubare wabo n’ibyo bakeneye.

Imirwano hagati ya FARDC na M23 ikomeje gufata indi ntera, mu gihe uyu mutwe w’abarwanyi umaze amezi arindwi ugenzura agace ka Bunagana, wigaruriye nyuma y’imirwano ikaze yabaye muri Werurwe 2022.