Ku nshuro ya mbere mu Rwanda habonetse abantu icyenda bishwe na Covid-19 mu munsi umwe, mu gihe umubare w’abayanduye wo wiyongereyeho 310.
Nk’uko bigaragara mu mibare yashyizwe ahagaragara na Minisiteri y’Ubuzima kuri uyu wa Kane tariki ya 21 Mutarama 2021, abantu icyenda barimo abagore bane b’imyaka 80 b’i Karongi, aba 61, 43 na 32 b’i Kigali n’abagabo batanu b’imyaka 86 b’i Huye, n’abafite imyaka 75, 73 na 72 bo muri Kigali ndetse n’uw’imyaka 58 wo mu karere ka Rubavu, bahitanywe n’iki cyorezo umunsi umwe, mu gihe abayikize ari 161.
Ibi byatumye umubare w’abamaze guhitanwa n’iki cyorezo kuva cyagera mu Rwanda muri Werurwe 2020 bagera ku 162.
Minisiteri y’ubuzima yatangaje ko mu bipimo bishya 4,359 byafashwe kuri uyu wa kane, abarwayi bashya banduye ari 310, bituma umubare w’abamaze kwandura mu gihugu bose ungana na 12,170.
- Advertisement -
Kuba abakize ari 161, byatumye umubare w’abamaze gukira bose hamwe mu Rwanda uba 7,973 naho abakirwaye bakaba ari 4,035.
Abarwayi bashya babonetse harimo 85 bo muri Kigali, Gatsibo: 57, Ngoma: 41, Gicumbi: 27, Huye: 18, Rulindo: 11, Karongi: 11, Musanze: 10, Nyagatare: 9, Gisagara: 7, Nyanza: 6, Kirehe: 6. Burera: 5, Rubavu : 5, Muhanga: 3, Rusizi: 2, Kamonyi: 2, Nyamagabe: 2, Ruhango: 2, na Nyamasheke yagaragayemo umurwayi 1.
Leta y’u Rwanda irakangurira Abantu bose gukomeza kwitwararika no kubahiriza amabwiriza yashyizweho, hitabwa cyane cyane ku gukaraba intoki kenshi n’amazi meza n’isabune, kwambara agapfukamunwa neza mu gihe umuntu avuye mu rugo cyangwa ahuye n’abantu benshi, no kwirinda ingendo zitari ngombwa mu rwego rwo gukomeza kwirinda ikwirakwira ry’iki cyorezo.
