Umutoza wa Gasogi United, Guy Bukasa, ku gicamunsi cyo kuri uyu wa Kane yagiranye ikiganiro n’itangazamakuru ari kumwe n’umuyobozi w’iyi kipe, akivamo ahita ajya gusinya amasezerano muri Rayon Sports.
Kuva ku wa Gatatu tariki ya 1 Nyakanaga, ni bwo hatangiye kuvugwa ko uyu mutoza ukomoka muri Repubulika Iharanira Demokarasi ya Congo, we n’umukinnyi Manace Mutatu Mbedi, bombi bagiranye ibiganiro na Rayon Sports ndetse bamwe bakavuga ko umutoza yasinye.
Mu kiganiro Guy Bukasa yagiranye n’itangazamakuru ku gicamutsi cyo kuri uyu wa kane yemeje ko yagiranye ibiganiro na Rayon Sports ariko avuga ko ari umutoza mukuru agomba kubanza gutegereza ikipe atoza.
Ati “Nta hantu ndasinya amasezerano, nta kipe n’imwe ndasinyira amasezerano y’imikorere mbisubiremo. Rayon Sports yaramvugishije ariko ntabwo ndasinya amasezerano. No muri Gasogi United sindongera amasezerano.”
- Advertisement -
Guy Bukasa umaze umwaka umwe mu Rwanda yavuze ko amaze kwakira ubusape bw’amakipe arenga 10, yifuza ko yayatoza ariko atarafata umwanzuro waho azerekeza.
Bukasa wari umaze umwaka muri Gasogi United yafashije iyi kipe kwitwara neza muri shampiyona 2019-2020, yatwawe na APR FC mu gihe Gasogi United yashoje iri ku mwanya wa 9 n’amanota 29.
Akiva muri iki kiganiro, nta masaaha abiri yashize, bihita bitangazwa ko yamaze gusinyira Rayon Sports azatoza mu gihe cy’imyaka itatu.
