Nyuma y’aho Ishyirahamwe ry’umupira w’amagaru mu Rwanda(FERWAFA) ritegetswe na Minisiteri ya Siporo n’Umuco guhagarika Shampiyona ku munsi wa Gatatu wayo bitewe nuko amakipe amwe n’amwe mu Rwanda yanze kubahiriza amabwiriza yo kwirinda covid-19, kuri ubu abakozi n’abakinnyi ba Musanze FC bagera ku 10 basanzwemo Covid-19.
Iyi kipe ya Musanze FC yapimishije abakozi bayo ndetse n’abakinnyi bose mu rwego rwo gushyira mu bikorwa amabwiriza basabwe na Minisiteri ya Siporo ibinyujije muri FERWAFA ryo gupimisha amakipe yose uko ari Cumi n’atandatu, mbere y’uko Abakinnyi basubira mu miryango yabo.
Amafaranga agera kuri miliyoni 1.69 Frw niyo yishyuriwe ikipe ya Musanze FC bapimisha abakozi 36 bayo, hanyuma kuwa Kane tariki ya 17 Ukuboza 2020 abakozi n’abakinnyi b’iyi kipe basubira mu miryango yabo bamaze gupimwa.
Amakuru yizewe ikinyamakuru Umurengezi.com cyamaze kumenya nuko mu bipimo byafashwe abo bose, byagaragaje ko abagera ku 10 bo mu muryango w’ikipe ya Musanze FC banduye COVID-19.
- Advertisement -
Mu cyumweru gishize ni bwo Minisiteri y’Umuco na Siporo iherutse gutangaza amwe mu makipe Abakinnyi bayo byamaze kugaragara ko banduye covid-19 arimo Musanze FC, APR FC, AS Kigali, Amagaju FC, Marine FC, Rutsiro na Alpha FC.
Nubwo bitavuzwe cyane, Ikipe ya Musanze FC mu nshuro zigera kuri eshatu bapimishije abakinnyi, umukinnyi umwe niwe wari wagaragayeho ubwandu bw’icyorezo cya Covid-19.
Amakipe menshi yo mu Rwanda yamaze kurekura abakinnyi bayo ngo babe bagiye mu miryango yabo mu gihe hataratangazwa igihe Shampiyona izongera gusubukurwa bijyanye n’ingamba zo kwirinda Covid-19.
Kuri uyu wa Gatandatu tariki ya ya 19 Ukuboza 2020, nibwo FERWAFA yoherereje ubutumire abayobozi b’amakipe mu nama izaba kuwa Kane tariki ya 24 Ukuboza 2020, aho bazigira hamwe ku isubikwa rya Shampiyona ndetse bakanagaragaza uburyo bazakora no kungurana ibitekerezo ku cyakorwa ngo Shampiyona yongere isubukurwe.
Ibi bibaye mu gihe Akarere ka Musanze gakomeje kugorwa n’icyorezo cya Covid-19 kurusha ahandi mu Rwanda, kuko kihariye 13% by’ubwandu bugaragara hirya no hino mu gihugu.
