Abanyeshuri barenga 300 bo muri Namibia banduye Covid-19 kuva amashuri yakongera gufungurwa muri Kamena 2020.
Minisiteri y’ubuzima muri iki gihugu yatangaje ko abenshi mu banduye ari abiga baba ku mashuri.
Minisitiri w’ubuzima Kalumbi Shangula yavuze ko amabwiriza yo kwirinda agomba kubahirizwa kugira ngo bahagarike ikwirakwira ry’iyi virusi, ahantu hegeranye nko ku mashuri.
Ibinyamakuru byaho bivuga ko iki cyorezo cyibasiye ishuri rimwe mu gace kitwa Oshikoto ahabonetse umubare munini w’abanyeshuri banduye.
- Advertisement -
Namibia yafunze amashuri mu kwezi kwa Gicurasi 2020 kubera iki cyorezo, iyafungura mu kwezi kwa Kamena ubwo abayobozi bavugaga ko abantu batakiri kwanduzanya imbere mu gihugu.
Abarimu bose n’abanyeshuri bari bategetswe kwambara udupfukamunwa buri gihe mu kwirinda iyi virusi.
Abakuriye amashuri nabo bari basabwe gutegeka isuku ishoboka mu mashuri.
Namibia kugeza ubu, imaze gutangaza abantu 11,373 banduye Coronavirus na 123 yishe.
