Perrence Shiri wayoboraga Ministeri y’Ubuhinzi muri Zimbabwe, wanagize uruhare mu ihirikwa ku butegetsi rya Perezida Robert Mugabe, yatabarutse ku myaka 65 nk’uko byatangajwe na Perezida Emmerson Mnangagwa kuri uyu wa Gatatu tariki ya 29 Nyakanga 2020.
Shiri wayoboye igisirikare kirwanira mu kirere imyaka 25 akaza kujya muri guverinoma mu 2017, yajyanye mu bitaro kuwa Kabiri, yitaba Imana mu masaha y’urukerera kuri uyu wa Gatatu.
Perezida Mnangagwa utatangaje icyishe uyu mu minisitiri yavuze ko yitangiye igihugu ubuzima bwe bwose.
Ati, “Shiri yari umuntu ukunda igihugu cyane, yatanze ubuzima bwe kugira ngo habeho ukwibohora, ubwigenge bw’igihugu kandi akomeza kugikorera.”
- Advertisement -
N’ubwo atatangaje icyishe Shiri ariko, hari ikinyamakuru cyandikira muri Zimbabwe cyatangaje ko yazize indwara y’ubuhumekero yatewe no gufatwa na Covid-19 imaze kwandurwa n’abantu 2,817 ikaba imaze no guhitana abagera kuri 40 muri iki gihugu.
Ishyaka ritavuga rumwe n’ubutegetsi riharaninira impinduka muri demokarasi, Movement for Democratic Change (MDC) rishinja Shiri kuba yari ari mu bayoboye ingabo zaryiciye abanyamuryango mu 2008, igihe bavuga ko ari bwo Mugabe yatsindwaga amatora bwa mbere.
