Umuhanzi Manzi James uzwi nka Humble Jizzo wabaye mu itsinda rya Urban Boys yari ahuriyemo na bagenzibe aribo Safi Madiba na Nizzo , yatangiye urugendo rwo gukora umuziki ku giti cye, mu gihe ibihe bitari kumukundira kuba ari kumwe na mugenzi we Nizzo Kaboss bahoranye mu itsinda ubwo Safi yari amaze kurivamo.
Uyu muhanzi yatngaje ko nyuma yo gusohora indirimbo yise ‘Ifi’. Yavuze ko iyo ndirimbo yayikoze ubwo yari amaze kubyemeranyaho na mugenzi we.
Ati “ Muri iyi minsi buri wese muri twe yihugiyeho, urasanga ari njye sindi mu Rwanda, Nizzo na we ahugiye mu bindi. Twemeranyije ko buri wese yaba akora ibye ariko bitavuze ko Imana idushoboje tutakorana.”
- Advertisement -
Humble Jizzo yahamije ko ari icyemezo yumvikanyeho na mugenzi we Nizzo ari nayo mpamvu ibihangano bya buri umwe nubundi azajya abinyuza ku mbuga zicuruza imiziki Urban Boys isanzwe ikoresha.
Yavuze ko byanze bikunze Urban Boys bazongera bagakorera hamwe.
Ati“Byanze bikunze, nguhaye nk’urugero vuba cyane hari ibyo turi kuganira tuzakorana ariko nyine ntibikuraho ko naba nkora na we akaba akora bitewe n’aho buri wese ari.”
Humble Jizzo ni umwe mu bahanzi bamamaye mu itsinda rya Urban Boys mbere y’uko itangira kuzamo ibibazo. Safi Madiba bahoranye yavuyemo mu 2018, ibyatumye hasigaramo babiri barimo Humble Jizzo na Nizzo Kaboss.
Bitewe n’impamvu z’umuryango we, Humble Jizzo yaje kuva mu Rwanda yimukira muri Kenya bituma n’ibikorwa by’itsinda bari basigaranye ari babiri bidindira kugeza ubwo kuri ubu buri wese yiyemeje kwikorana umuziki.
