Mu bihugu bitandukanye, imikino ya shampiyona yarakinwe n’andi marushanwa arakomeza cyane ko akaruhuko k’imikino ya gicuti ku makipe y’ibihugu kari karangiye.
Uko ni na ko bimeze kuri bamwe mu bakinnyi b’Abanyarwanda bagiye gushaka amaronko mu bihugu byo hanze bafashije amakipe yabo nubwo hari abo shampiyona zabo zitahiriye muri iyi minsi.
Kapiteni w’u Rwanda, Bizimana Djihad, ukinira FC Kryvbas Kryvyi Rih yo muri Ukraine yakinnye na Veres Rivne yegukana amanota atatu ku bitego 2-0 ndetse iguma mu murongo wo gukubana na Shakhtar Donetsk mu rugendo rwo guhatanira igikombe.
- Advertisement -
Aya makipe yombi anganya amanota 46 usibye ko Shakhtar iyirusha ibitego birindwi izigamye.
Myugariro Rwatubyaye Abdul ukinira KF Shkupi yo muri Macedonia yabonye ikarita itukura mu mukino wahuje ikipe ye na FK Vardar Skopje mu mukino w’umunsi wa 25 wa Shampiyona.
Ni umukino warangiye ikipe ye itsinze ibitego 3-0 ndetse iguma ku mwanya wa kabiri ku rutonde rusange.
Nyuma yo kuva mu Ikipe y’Igihugu ‘Amavubi’, rutahizamu Nshuti Innocent yakomereje muri Leta Zunze Ubumwe za Amerika gufatanya n’ikipe ye ya One Knoxville SC gukomeza intangiriro nziza za Shampiyona y’icyiciro cya gatatu.
Umukino wabaye ku wa Gatandatu, tariki ya 30 Werurwe wasize One Knoxville SC itsinze Tormenta FC igitego 1-0 ikomeza kuyobora Shampiyona nyuma y’iminsi itatu, Nshuti wabanje hanze ajyamo ku wa 60 nubwo nta gitego yabonye.
Shampiyona y’Icyiciro cya Kabiri muri Suède yatangiye gukinwa ariko ikipe ya Sandvikens IF ikinamo Byiringiro Lague na Mukunzi Yannick ntiyahirwa ku munsi wa mbere.
Byiringiro yabanje ku ntebe y’abasimbura yinjira mu kibuga ku munota wa 77 ariko ntiyagira icyo afasha ikipe ye ku bitego 4-0 yanyagiwe na Landskrona BoIS ndetse ihita itangirira ku mwanya wa nyuma.
Iyi Shampiyona kandi ikinamo Rafael York ubarizwa hagati mu kibuga mu ikipe ya Gefle IF nubwo yo ifite umukino kuri uyu wa Mbere, tariki ya 1 Mata.
Impera z’icyumweru ntabwo zagenze neza kuru St. Liège yo mu Bubiligi ikinamo Hakim Sahabo kuko yanyagiwe na KAA Gent ibitego 5-1 mu mukino uyu munyarwanda atagaragayemo.
Umunyezamu Maxime Wenssens ukinira Royale Union SG ntabwo ari mu bakinnyi yitabaje ku mukino ifitanye na Genk ku mugoroba wo kuri uyu wa Mbere, tariki ya 1 Mata 2024.
Manzi Thierry ukinira Al Ahli Tripoli muri Libya ari gufatanya n’abandi kwitegura umukino ukomeye w’igikombe kiruta ibindi muri icyo gihugu kizahuza ikipe ye na Al-Ittihad, ku wa Gatanu, tariki ya 5 Mata.
Mutsinzi Ange ukinira FC Jerv ikina mu Cyiciro cya Gatatu muri Norvège aracyari mu karuhuko cyane ko ikipe ye yitegura gutangira imikino ya Shampiyona ku wa Gatandatu ihura na Ørn-Horten.
Muri izi mpera z’icyumweru kandi yagaragaye mu bakinnyi 11 babanje mu kibuga ubwo banganyaga na Flekkerøy ibitego 2-2 mu mukino wa gicuti.
