Leta y’Ubufaransa yemeye gutanga amafaranga angana na Miliyari umunani z’amayero(8,000,000,000Euro) nk’inyongera y’umushahara w’abaganga mu rwego rwo kubashimira uhare n’umurava bagira mu kurwanya icyorezo cya coronavirus.
Ibi bibaye nyuma y’uko abaganga bo muri iki gihugu bari bamaze iminsi bakora imyigaragambyo bavuga ko bahabwa umushahara w’intica ntikize kandi bavunika cyane, bagasaba ko bakongererwa umushahara ndetse n’imikorere yabo igakosorwa.
Mu masezerano iyi Leta yagiranye n’amashirahamwe y’aba bakozi kuri uyu wa mbere tariki ya 13 Nyakanga 2020, harimo no kongererwa imishahara, umwanzuro ufashwe nyuma y’igihe kirenga ukwezi n’igice hakorwa ibiganiro hagati ya Leta n’abakozi ariko ntibigire icyo bitanga.
Kuva icyorezo cya covid-19 cyagaragara ku Isi, abaganga bagiye bagaragaza ibikorwa by’ubutwari ku buryo hari n’ahagiye hamanikwa ibyapa bishimira ubwitange n’umurava bagira mu gutabara ubuzima bw’abantu.
- Advertisement -
Kugeza ubu, mu gihugu cy’Ubufaransa hamaze kwandura abasaga ibihumbi Magana abiri(200,000), mu gihe abarenga ibihumbi mirongo itatu(30,000) bahitanywe n’iki cyorezo cya Covid-19.
NGENDAHIMANA J.Pierre(Zinc G) / Umurengezi.com
