Abakinnyi barimo umunya-Pologne, Kamil Majchrzak n’Umunya-Argentine Marco Trungelliti, ni bo bageze ku mukino wa nyumwa w’irushanwa mpuzamahanga rya TP Challenger 50 Tour riri kubera mu Rwanda.
Ibi byabaye ku munsi wa gatanu w’irushanwa mpuzamahanga rihuza abakinnyi ba Tennis babigize umwuga riri kubera mu Rwanda, guhera tariki ya 26 Gashyantare kugeza 10 Werurwe 2024.
ATP Challenger ni irushanwa riri muri atanu ategurwa n’Ishyirahamwe ry’Umukino wa Tennis ku Isi. Ku nshuro ya mbere riri gukinirwa muri Afurika yo munsi y’ubutayu bwa Sahara, ku bibuga bya IPRC-Kigali.
- Advertisement -
Mu bakinnyi 60 baryitabiriye, Umuholandi Max Houkes ari mu bahabwaga amahirwe yo kuryegukana ntiyahiriwe n’uyu munsi kuko yasezerewe n’Umunya-Polonge, Kamil Majchrzak, nyuma yo kumutsinda amaseti 2-1 [4-6 6-4 6-3].
Undi mukino wari ukomeye wamaze amasaha hafi atatu, Marco Trungelliti wo muri Argentine yatsinze Umunyamerika, Stefan Kozlov amaseti 2-1 [3-6 6-4 6-3] ahita abona itike yo gukina na Majchrzak umukino wa nyuma.
Si iyi mikino yabaye gusa kuko n’abakina ari babiri (Doubles) Max Houkes wakinanye na Clement Tabur bakuyemo Thomas Fancutt wakinanaga na Hunter Reese amaseti 2-0 [6-1 6-1], bagera ku mukino wa nyuma.
Abazava hagati ya Juan Paz na Hernan Casanova bazahura na Christopher Rungkat ufatanya na Pruchya Isaro.
Umukinnyi uzitwara neza muri “ATP Challenger 50 Tour” azaba afite amahirwe yo kugera mu bakinnyi 100 ba mbere beza ku Isi no gukina amarushanwa ya ATP Tour na ‘Grand Slam’.
Umunsi wa gatandatu ugomba gusiga hamenyekanye abakinnyi abazegukana iri rushanwa ryitabiriwe n’ibihangange mu mukino wa Tennis.
