Polisi y’u Rwanda ikorera mu Karere ka Rubavu, iratangaza ko yarashe ikomeretsa umufungwa ukekwaho gushaka gutoroka nyuma yo gufatanwa urumogi, akabanza gutera umupolisi umucanga mu maso kugira ngo atamukurikira.
Uyu mugabo yafatanywe urumogi aruvanye muri Repubulika iharanira ya Demokarasi ya Congo, anyuze mu kibaya kiri munsi y’ikirunga cya Nyiragongo, kuri iki Cyumweru tariki ya 18 Ukwakira 2020.
Mu gihe hari hategerejwe imodoka ngo imujyane mu kato kuko yari avuye hanze y’igihugu kandi imipaka ifunze kubera COVID-19, yagerageje gutoroka atera umupolisi umucanga mu maso, ariruka, umupolisi ahita amurasa ukuguru agwa hasi.
Umuvugizi wa Polisi mu Ntara y’Iburengerazuba, CIP Bonaventure Karekezi, avuga ko uyu mugabo yateye umucanga mu maso umupolisi kugira ngo atamubona, undi amurasa ukuguru.
- Advertisement -
Agira ati, “Yafatanywe udupfunyika 400 tw’urumogi aruvanye muri Congo, bamujyana kuri sitasiyo ya Busasamana, nuko atera umucanga mu maso umupolisi wari umurinze kugirango ahume ntarebe neza, ariruka, umupolisi amurasa mu kuguru ahita agwa hasi, ubu yajyanywe mu bitaro bya Gisenyi kwitabwaho.”
Mu karere ka Rubavu mu mirenge ituriye ikibaya gihuza u Rwanda na Congo, hakunze kuba indiri ya magendu y’urumogi, kenshi ababikoze bagafatwa bagerageza kwinjira ku butaka bw’u Rwanda.
Ni ibikorwa birimo kuba mu gihe imipaka y’u Rwanda ku butaka ifunzwe mu kwirinda icyorezo cya Covid-19, uretse ku bwikorezi bw’ibicuruzwa, abemerewe kwinjira akaba ari Abanyarwanda batahutse kandi nabo bahita bashyirwa mu kato k’iminsi 14.
