Uwahoze ari rutahizamu w’Ikipe y’Igihugu ya Brésil n’andi makipe akomeye i Burayi, Robinho yatsinzwe ubujurire bwo kugabanyirizwa igihano mu gihe amaze amezi atandatu afunzwe.
Uyu mukinnyi wakiniye amakipe arimo Manchester City, Milan AC na Real Madrid, aheruka gukatirwa igifungo cy’imyaka icyenda kubera gufata ku ngufu.
Robinho w’imyaka 40, yahamijwe n’urukiko rwo mu Butaliyani mu 2017 kuba mu gatsiko kafashe ku ngufu umugore w’Umunya-Albania w’imyaka 22 mu 2013.
- Advertisement -
Muri Werurwe, abacamanza bo muri Brasília bategetse ko agomba gukorera igifungo cye muri Brésil nyuma yo kubisabwa n’u Butaliyani. Brésil ntijya itanga abaturage bayo ngo bajye gufungirwa aho bahamirijwe ibyaha.
Nyuma yo gutabwa muri yombi muri Werurwe, uyu mugabo utunze agatubutse, yakuwe iwe muri Santos, ajya gufungirwa ahe wenyine mu gihe cy’iminsi 10.
Mu minsi yakurikiyeho, Robinho ubarirwa umutungo wa miliyoni 60£ (asaga miliyari 104 Frw), yajyanywe muri kasho ya metero kare umunani aho ayibanamo n’indi mfungwa.
Muri Nyakanga, yajuririye igihano yahawe kugira ngo kigabanywe ndetse abe yakurikiranwa adafunzwe, ariko ikinyamakuru Portal Leo Dias cyatangaje ko inkiko zo muri Brésil zamuteye utwatsi.
Gusa, Robinho aracyafite amahirwe kuko mu butabera bwa Brésil, uwahamijwe icyaha ashobora kujurira inshuro nyinshi kugira ngo agabanyirizwe igihano cyangwa icyaha cye gihindurirwe inyito.
Ku rundi ruhande, amakuru avuga ko kuri ubu uyu wahoze ari umukinnyi wa ruhago, ari mu biga gukora za televiziyo, radiyo n’ibindi bikoresho muri gereza.
Umwunganira mu mategeko, Mario Rosso Vale, yavuze ko umukiliya we yitwara neza kuva afunzwe muri Werurwe.
Robinho wakiniye Brésil imikino 100, yakiniraga Milan AC ubwo icyaha yahamijwe cyabaga.
Nyuma yo guhamywa iki cyaha, yatsinzwe ubujurire mu 2020 mbere y’uko Urukiko Rukuru rw’u Butaliyani rugumishaho igifungo cye mu 2022.
Icyo gihe, abashinjacyaha b’u Butaliyani basabye ko uyu mugabo wahoze ari umukinnyi ukomeye atabwa muri yombi.
Mbere yo gufungwa, yabwiye itangazamakuru ryo muri Brésil ko imibonano mpuzabitsina ashinjwa yabaye ku bwumvikane.
Mu rugendo rwe rwo gukina, yatwaye ibikombe bibiri bya La Liga mu myaka ine yamaze muri Real Madrid, mbere yo kugurwa na Manchester City miliyoni 32,5£ [yari menshi icyo gihe mu Bwongereza] ku munsi wa nyuma w’igura ry’abakinnyi muri Nzeri 2008, ubwo iyi kipe yari imaze kugurwa na Sheikh Mansour.
Nyuma y’imyaka ibiri, Robinho yagiye muri Milan AC, ahamara imyaka itanu mbere yo kwerekeza muri Guangzhou Evergrande yo mu Bushinwa na Clube Atlético Mineiro y’iwabo.
