Mu ijoro ryakeye, mu karere ka Nyanza, mu Murenge wa Muyira, mu Kagari ka Gati, mu Mudugudu witwa Kiniga hafashwe abantu basanzwe basengera mu idini y’Abarokore (ADEPR) mu rugo rw’umuturage witwa Xavier Zirimwabagabo, bakaba bafashwe bazira ko bakoze ibihabanye n’amabwiriza yo kwirinda Coronavirus.
Bavuga ko icyabateye kujya gusengera kwa Zirimabagabo ari uko barimo basengera umukobwa usanzwe arwara indwara yo kwitura hasi, nk’uko Umuyobozi w’Akarere ka Nyanza; Erasme Ntazinda yabibwiye Flash Tv.
Meya Ntazinda avuga ko aba baturage bahisemo gusenga ku giti cyabo, ko batari batumwe n’itorero ryabo ndetse ngo ntabwo bari bazwi ho ubutagondwa bw’imyemerere.
Aragira ati: “Ni abayoboke b’Itorero rya ADEPR, basanzwe atari intagondwa; ngo barimo basengera umuntu urwaye Igicuri. Twavugishije Pasiteri wabo atubwira ko abo bagiyeyo ntawabatumye kandi ko ibyo bakoze atari byo na bo basaba imbabazi”
- Advertisement -
Abo bahise bajyanwa kuri Sitasiyo ya Polisi ikorera mu Murenge wa Muyira, gusa umwe muri bo akaba yatorotse.
Mu minsi ishize, mu karere ka Nyanza hari abantu 613 bafashwe barenze ku mabwiriza yo kwirida Coronavirus, aba 9 bakaba biyongereyeho, ndetse kandi Ibikorwa nk’ibi hari abantu 23 bafashwe kuwa Kabiri tariki 11 Kanama, mu Karere ka Gatsibo na bo bariho basengera mu rugo rw’umuturage.
