Umusaza witwa Bazirake Laurent w’imyaka 75, wari utuye mu Kagari ka Kabeza, Umurenge wa Nyange, mu Karere ka Musanze, yitabye Imana nyuma y’uko aturikanywe na Grenade yo mu bwoko bwa Stick.
Ibi byabaye kuri uyu wa kabiri tariki 27 Kamena 2023, ubwo uwo musaza yari mu kiraka cyo guhingira ishyamba ry’umuturage witwa Bizimana.
Iyo Gerenade ikimara guturika, yahise imukomeretsa bikomeye amaguru n’amaboko, ajyanwa kwa muganga ariko birangira ahasize ubuzima.
Umunyamabanga Nshingwabikorwa w’Umurenge wa Nyange, Tuyisenge Vedaste, yabwiye Kigali Today dukesha iyi nkuru ko bihutiye kumugeza mu bitaro bya Ruhengeri, aho yitabye Imana mu ijoro ryakeye rishyira kuri uyu Gatatu tariki 28 Kamena 2023.
- Advertisement -
Agira ati, “Akimara gukomereka bikomeye, yagejejwe mu bitaro bya Ruhengeri, ariko ubu ngubu ntabwo akiriho, yitabye Imana mu ijoro, aho yaguye mu bitaro bya Ruhengeri. Igikurikiyeho ni ugutegura kumushyingura.”
Inzego zishinzwe umutekano mu Karere ka Musanze, zagaragaje ko iyo Gerenade yari yarasaziye mu butaka.
