Umwongereza Daniel Dubois yatsinze mugenzi we Anthony Joshua kuri “Knockout” nyuma y’uduce dutanu, aba umukinnyi w’iteramakofe wa mbere ku Isi mu 2024, mu bafite ibilo byinshi (IBF Heavyweight Champion).
Uyu mukino wishiraniro wabaye mu ijoro ryo ku wa Gatandatu, tariki 21 Nzeri 2024 kuri Wembley Stadium i Londres mu Bwongereza, yari yuzuye abafana ibihumbi 96.
Ni umukino wari witezwe cyane kuko wahuzaga izina rikomeye muri uyu mukino, Joshua ndetse na Dubois uri kuzamuka neza.
- Advertisement -
Uyu mukinnyi w’imyaka 27, ntabwo yoroheye Joshua kuko muri uyu mukino wakinwe mu duce (round) dutanu, warangiye amutsinze kuri ‘Knockout’, ubwo yamukubitaga igipfunsi undi kweguka bikanga.
Daniel Dubois yahise yambura Joshua umukandara (igihembo) cy’umukinnyi mwiza mu bafite ibilo byinshi, aho ubu yabaye umukinnyi w’iteramakofe wa mbere ku Isi mu 2024, mu bafite ibilo byinshi [IBF Heavyweight Champion].
Anthony Joshua yagiye muri uyu mukino yifuza gukora amateka yo kuba umukinnyi w’iteramakofe wa mbere ku Isi w’umwaka, (Heavyweight Champion) ku nshuro ya gatatu akajya mu banyabigwi nka Muhammad Ali, Lennox Lewis, Evander Holyfield na Vitali Klitschko.
Nyuma y’umukino, Joshua yatangaje ko azakomeza gukina kuko ari indwanyi.
Ati “Cyane rwose ndakifuza gukomeza gukina. Rimwe uratsinda ubundi ugatsindwa, rero ntabwo nakwiruka kuko ndi indwanyi.”
Ni mu gihe Dubois we yatangaje ko yifuza kujya ku gasongero ku uyu mukino.
Ati “Ndashaka kujya ku gasongero k’uyu mukino nkagera kubyo nifuza byose. Ndashima ikipe n’umuryango babaye inyuma yanjye kuva ku munsi.”
Ubwo uyu mukino wari urarangiye kandi, Dubois yatangaje ko yifuza kuzahangana na Oleksandr Usyk mu mukino utaha, aho ashaka kumwishyura kuko muri Kanama 2023 yari yamutsinze.
Biravugwa ko umurwano utaha ushobora kuba tariki 21 Ukuboza 2024.
