Kuri uyu wa kabiri tariki ya 28 Nzeri 2021 , abakunzi ba Ruhago barasubira ku bibuga bihera ijisho imikino ya Champions league, igikombe kiruta ibindi ku isi, aho mu mukino itegerejwe n’abantu benshi cyane ari Paris Saint-Germain(PSG) yo mu gihugu cy’u Bufaransa iza kwakira Manchester city yo mu Bwongereza, umukino w’umunsi wa kabiri mu itsinda A.
Iyi kipe ya PSG igomba gukinira imbere y’abakunzi bayo kuri ‘Parc des princes’ ku isaha ya saa tatu z’ijoro (21h00), bikaba byitezwe ko umukinnyi Lionel Messi nawe ashobora kugaragara muri uyu mukino nyuma yo kutagaragara mu mikino ibiri yabanje bitewe n’ikibazo cy’imvune.
Umutoza w’ikipe ya PSG , Bwana Mouricio Pochettino, yatangaje ko urutonde rw’abakinnyi baza kwifashishwa kuri uyu mukino, ruza gushyirwa ahagaragara kuri uyu wa kabiri. Aragira ati, “Tuzemeza abakinnyi 11 bazabanza mu kibuga duhatana na Man. City ku gicamunsi, gusa na none ndatekereza ko Messi azaba ari mu bazakina umukino.”
Uyu mutoza kandi yakomoje kuri Messi utarinjiza igitego kuva yagera muri iyi kipe mu mikino itatu amaze gukina, maze Pochettino ashimangira ko Lionel akwiye guhabwa umwanya wo kubanza kumenyera. Ati, “Murabizi neza yamaze imyaka igera kuri 20 mu ikipe ya Barcelona, birumvikana yahafataga nko mu rugo, ariko hano i Paris ni hashya kuri we nta gihe kinini aramara hano.”
- Advertisement -
Andi makuru avugwa muri Paris Saint-Germain ni umusore Marco Verratti w’umutaliyani ukina mu kibuga mo hagati, ushobora kugaruka kuri uyu mugoroba nyuma y’igihe kinini ari mu mvune zanatumye asiba imikino 4 iheruka gukinwa n’iyi kipe.
Umunya-Argentine Lionel Messi utarinjiza igitego kuva yagera muri iyi kipe, akaba yaratsinze ibitego 6 mu mikino 4, bigatuma arusha abandi bakinnyi bose bahuye n’umutoza Pep Guadiola mu mikino ya Champions league.
Ubwo yagarukaga kuri uyu mukino w’ishyiraniro, Pep Guadiola utoza Manchester city yavuze ko uraba ari umukino mwiza, gusa akibaza uburyo aza guhagarika ubusaitirizi bw’ikipe ya Pochettino ifite ibihangage nka Messi, Neymar na Mbappe’. Ati, “Ndatekereza ko umukinnyi mwiza ibikorwa bye birivugira, nibyo koko twagize amahirwe yo kumubona mu myaka 16 ishyize nk’umunyamwuga ukina neza cyane.”
Guadiola kandi agaruka kuri ba Rutahizamu ba PSG yunzemo agira ati, “Aba bakinnyi ni beza sinzi uko nabahagarika, n’impano zabo zituma bigorana kurushaho, bisaba kugarira neza mu gihe udafite umupira, kuko uhagaze nabi bagutsinda ibitego. Ni abakinnyi batatu bashobora kugora uwo ,ariwe wese ndetse bagakora icyo bashatse imbere y’izamu.”
Manchester city yatsinze PSG igiteranyo cy’ibitego 4 muri 1/2 cya Champions league iheruka mbere y’uko itsindwa na Chelsea ku mukino wa nyuma, kuri ubu hakaba hakomeje kwibazwa aho iki gikombe kizerekeza muri uyu mwaka.
Paris Saint-Germain igiye gucakirana na Man. City yaguze Messi umaze kwinjiza ibitego 120 muri UEFA Champions league, umukinnyi Segios Ramos watwaye iri rushanwa inshuro zigera kuri enye, umukinnyi w’irushanwa rya EURO 2020 Gianluigi Donnarumma n’ibindi bihangage bitandukanye.
Aya makipe yombi afatawa nk’afite amafaranga menshi kurusha ayandi makipe mu myaka y’ibihumbi bibiri, Manchester city yaguzwe na Abu Dhadi United group mu 2008,mu gihe PGS ifitwe na Quatar Sports Investment kuva mu mwaka wa 2011.
Ibikombe 7 mu icyenda bya shampiyona, Paris Saint-Germain iheruka gutwara bitatu, mu gihe ikipe ya Manchester city yegukanye birindwi, ibi byose bikaba byaraziheshejwe n’ibigo byaziguze.
Manchester city iraza gukina uyu mukino idafite Gundogan wagize ikibazo cy’imvune ubwo bacakiranaga na Southmpton mu mukino wa shampiyona y’Ubwongereza. Undi musore nawe ushobora kutagaragara muri uyu mukino ni Olekasandr Zinchenko ukina yugarira ku ruhande rw’ibumoso.
Abandi bakinnyi bagarutse baza kugaragara kuri uyu mukino ni Rodri na Aymeric Laporte bagarutse ubwo batsiga ikipe ya Chelsea kuwa Gatandatu, ni mu gihe kandi umukinnyi John stones ashobora kugaragara uyu munsi cyane ko ubushyize yari ku ntebe y’Abasimbura.
Dore ibindi wamenya kuri aya makipe yombi
- Manchester city na Paris-Germain zigiye guhura ku nshuro ya 6, mu gihe kandi PSG ikomeje gutegereza kuba yatsinda umukino wa mbere.
- PSG idaheruka gutsindira imbere y’abafana mu mikino 3 iheruka , yanganyije na Club brugge ibitego 1-1 mu mukino w’umunsi wa mbere, bituma igeza imikino 4 yose yikurikiranya muri Champions league. Yanganyije umwe, itsinda itatu.
- Ikipe ya Manchester city imaze imikino 10 idatakariza hanze ya UEFA champions league. Yatsinze imikino 8 inganya imikino 2 yonyine, mu gihe kandi iheruka gutakariza hanze y’ubwongereza mu kwezi k’Ukuboza 2017, ubwo umukino warangiraga ari ibitego 2-1 cya Shakhtar Donetsk.
- Ikipe ya Paris Saint-Germain yatsikiye imikino itatu iheruka kwakiramo amakipe muri shampiyona y’Ubwongereza,ubwo yakinaga na Manchester united mu mwaka wa 2019 na 2020, kuri ubu ikaba igiye guhura na Manchester city kuri iyi nshuro muri 2021.
Indi Mikino iteganijwe kuri uyu munsi saa 21h00′
Itsinda A
- Paris Saint-Germain vs Manchester city
- RB Leipzig vs Club Brugge
Itsinda B
- AC Milan vs Atle’tico Madrid
- FC Porto vs Liverpool
Itsinda C
- Ajax vs Besiktas – Saa 18h00′
- Borussia Dortmund Vs Sporting CP
Itsinda D
- Shakhtar Donetsk vs Inter Milan
- Real Madrid vs Sheriff
