Ikipe y’Igihugu y’u Rwanda “Amavubi” yagumye ku mwanya wa 133 ku rutonde rw’Ishyirahamwe ry’Umupira w’Amaguru ku Isi (FIFA)
Ikipe y’u Rwanda yari yasoje umwaka wa 2023 iri kuri uyu mwanya nyuma yo kwitwara neza mu mikino ibiri yo gushaka itike y’Igikombe cy’Isi cya 2026, yabaye mu Ugushyingo.
Urutonde rwashyizwe hanze n’Ishyirahamwe ry’Umupira w’Amaguru ku Isi (FIFA), kuri uyu wa 15 Gashyantare, ni urwa mbere mu 2024, rugaragaza ko u Rwanda ruri mu bihugu bitanyeganyeze kuko rwagumye ku mwanya wa 133 ndetse rugumana amanota 1107,04 nyuma yo kudakina kuva mu mezi atatu ashize.
- Advertisement -
Nta mpinduka kandi zabaye mu bihugu 10 bya mbere ku Isi, aho urutonde ruyobowe na Argentine ikurikiwe n’u Bufaransa, u Bwongereza, u Bubiligi, Brésil, u Buholandi, Portugal, Espagne, u Butaliyani na Croatia.
Ibihugu 10 bya mbere muri Afurika ni Maroc (ya 12 ku Isi nyuma yo kuzamuka umwanya umwe), Sénégal (17 yazamutse imyanya itatu), Nigeria (28 yazamutse imyanya 14), Misiri (36 yamanutse imyanya itatu), Côte d’Ivoire (39 yazamutse imyanya 10), Tunisia (41 yamanutse imyaka 13), Algeria (43 yamanutse imyanya 13), Mali (47 yazamutse imyanya ine), Cameroun (51 yamanutse imyanya itanu) na Afurika y’Epfo ya 58 nyuma yo kuzamuka imyanya umunani.
Mu bihugu bituranye n’u Rwanda, Repubulika Iharanira Demokarasi ya Congo ni iya 63 yazamutse imyanya ine, Uganda (92), Kenya (ni iya 111 yamanutse umwanya umwe), Tanzania (ya 119 yazamutse imyanya ibiri) n’u Burundi (bwa 140 nyuma yo gusubira inyuma umwanya umwe).
Impinduka mu bihugu byo muri Afurika zaturutse ku buryo byitwaye mu Gikombe cya Afurika giheruka kubera muri Côte d’Ivoire.
Eritrea yakuwe ku rutonde nyuma yo kumara amezi asaga 48 idakinnye umukino n’umwe.
Qatar yegukanye Igikombe cya Asia, yazamutse imyanya 21 igera ku wa 37 naho Jordanie yatsindiwe ku mukino wa nyuma iba iya 70 nyuma yo kuzamuka imyanya 17.
Urutonde rutaha ruzasohoka ku wa 4 Mata 2024.
