Rutahizamu wa Al-Nassr, Cristiano Ronaldo yahagaritswe umukino umwe adakina kubera gukora ikimenyetso gifatwa nk’urukozasoni, yakoze asubiza abafana bamuririmbiraga bavuga izina Messi.
Ni igikorwa Ronaldo yakoze mu mukino ikipe ye ya Al-Nassr yatsinzemo Al-Shabab ibitego 3-2 mu mukino w’umunsi wa 21 wa shampiyona ya Arabie Saoudite.
Amaze gufungura amazamu kuri penaliti, yishimiye igitego agaragaza ibihabanye n’umuco w’iki gihugu mu gusubiza abafana bari bahereye kare bamuririmbira izina Messi bahanganye igihe kinini.
- Advertisement -
Nyuma y’iperereza ryakozwe n’Ishyirahamwe rya ruhago muri iki gihugu, ryamuhanishije kuzasiba umukino umwe ndetse no gutanga amande ya £6,300.
Kenshi amakipe aba agiye gukina na Al Nassr, abafana bayo baririmba Messi wahanganye na Ronaldo hafi imyaka 20 mu rwego rwo kumukura mu mukino.
Kugeza ubu, ku rutonde rwa shampiyona, Al-Nassr iri ku mwanya wa kabiri n’amanota 52 aho irushwa arindwi na Al Al Hilal iruyoboye. Ni mu gihe Ronaldo we amaze gutsinda ibitego 20 mu mikino 22 amaze gukina muri uyu mwaka.
