Ikipe y’Igihugu ya Argentine yageze muri ½ cya Copa América 2024, isezereye Équateur kuri penaliti 4-2 nyuma yo kunganya igitego 1-1 mu minota 90 isanzwe y’umukino.
Uyu mukino wa mbere wa ¼ wabaye mu rukerera rwo ku wa Gatanu, tariki 5 Nyakanga 2024, muri Leta Zunze Ubumwe za Amerika aho iri rushanwa rikomeje kubera.
Équateur yatangiye umukino neza ndetse ihusha igitego cya mbere ku munota wa 14, ku mupira umunyezamu Emiliano Martínez yakujemo amaguru.
- Advertisement -
Mu minota 30, Argentine yatangiye kwinjira mu mukino ari na ko ihusha uburyo bwinshi bw’ibitego. Ku munota wa 34, Lionel Messi yateye koruneri neza, umupira usanga Lisandro Martínez akina n’umutwe atsinda igitego cya mbere.
Igice cya mbere cyarangiye Argentine yatsinze Équateur igitego 1-0.
Équateur yasubiranye imbaraga mu gice cya kabiri, yabonye penaliti ku munota wa 61 ariko kapiteni Enner Valencia arayihusha ku mupira yateye ugakubita igiti cy’izamu ukavamo.
Mu minota y’inyongera, William Pacho yahinduye umupira imbere y’izamu, Kevin Rodríguez akina n’umutwe yishyura igitego, umukino urangira amakipe yombi anganya 1-1.
Muri iri rushanwa ry’uyu mwaka, iminota 30 y’inyongera yakuweho bityo hahise haterwa penaliti.
Argentine yatsinze umukino kuri penaliti 4-2, aho imwe ari Lionel Messi wayihushije ubwo yateraga iya mbere.
Iyi kipe yabonye itike ya 1/2, igomba kuzahura n’iva hagati ya Venezuela na Canada zikina mu gicuku cyo ku wa Gatandatu, tariki 6 Nyakanga 2024.
Indi mikino ya ¼ iteganyijwe ku Cyumweru, tariki 7 Nyakanga 2024, aho Uruguay izakina na Brésil, Colombia igahura na Panama.
