CAN 2023: Umusaruro muke kimwe mu birimo gutuma abatoza birukanwa.

Mu gihe imikino y’Igikombe cya Afurika irimo kugana ku musozo, abatoza bari bafite amakipe y’Ibihugu, bakomeje kwirukanwa, abandi barimo gusezera.

Imikino y’Igikombe cya Afurika ya 2023 irimo kubera muri Côte d’Ivoire, irimo gusoza iyo mu majonjora, ndetse amakipe amwe yamaze gukatisha itike ya 1/8.

Ni irushanwa ryagaragayemo gutungurana, cyane ko Ibihugu byahabwaga amahirwe yo kuzaryegukana, yatunguwe mu buryo bwatunguye benshi.

- Advertisement -

Uwari Umutoza w’Ikipe y’Igihugu ya Tanzania, Adel Amrouche, yirukaniwe mu Gikombe cya Afurika ndetse anacibwa amande y’ibihumbi 10$ kuko yibasiye Maroc avuga ko igira uruhare mu byemezo bya ruhago muri Afurika.

Mu ijoro ryo ku wa Gatanu, tariki ya 19 Mutarama 2024, ni bwo Ishyirahamwe rya Ruhago muri Tanzania (TFF) ryatangaje ko rihagaritse burundu Umubiligi, Adel Amrouche wari umutoza w’Ikipe y’Igihugu.

Hakurikiyeho Umutoza w’ikipe y’Igihugu ya Gambia, Tom Saintfiet wamaze kwegura kuri izi nshingano nyuma yo gusezererwa kw’iki Gihugu mu Gikombe cya Afurika cya 2023.

CAF yaciye Adel Amrouche ibihumbi 10$ kubera kuyisuzugarira imbere y’itangazamakuru

Uyu mutoza yari amaze imyaka itanu n’igice ari kubaka iyi kipe y’Igihugu. Gambia yasezerewe mu Gikombe cya Afurika, nta mukino n’umwe itsinze.

Undi mutoza wahise amukurikira, ni Chris Hughton watozaga ikipe y’Igihugu ya Ghana. Uyu yamaze kwirukanwa nk’uko byemejwe n’Ishyirahamwe rya ruhago mu gihugu cya Ghana, nyuma yo gusezererwa itarenze amatsinda.

Chris Hughton yamaze gusezererwa mu kipe y’Igihugu ya Ghana

Undi mutoza waciye amarenga yo gutandukana n’ikipe y’Igihugu, ni Djamel Belmadi utoza ikipe y’Igihugu ya Algerie nyuma yo gusezererwa na Mauritanie itsinzwe igitego 1-0 mu mukino wa Gatatu wo mu itsinda rya Kane.

Amakuru ava muri iki Gihugu, avuga ko uyu mutoza yamaze gusezera ku bakinnyi bakuru ngenderwaho muri iyi kipe.

Nyuma yo kwegukana igikombe cya Afurika cya 2019, Algerie ntiyahiriwe mu Gikombe cya Afurika cya 2021 kuko yasezerewe nta mukino itsinze.

Icyo gihe yatsinzwe na Côte d’Ivoire na Guinée Equatoriale, inganya na Sierra Leone.

Muri iki Gikombe cya Afurika cya 2023 kiri kubera muri Côte d’Ivoire, yasezerewe ifite amanota abiri nyuma yo kunganya na Angola igitego 1-1 na Burkina Faso ibitego 2-2, igatsindwa na Mauritanie igitego 1-0.

Nyuma yo kugayika muri iri rushanwa, amakuru avuga ko bamwe mu bakinnyi bafite amazina muri Algerie, bashobora gutangaza ko basezeye gukinira ikipe y’Igihugu.

Nyuma y’iri rushanwa, abandi batoza bashobora kuzerekwa umuryango, abandi bagasezera kuko batageze ku nshingano za bo.