Urwego rw’Igihugu rw’Ubugenzacyaha (RIB) rwataye muri yombi Umutoza w’Ikipe y’Abato ya Etincelles FC, Bizimana Abdou ’Bekeni’, wakubise umutwe Team Manager w’iya Marine FC, Nsengiyumva Aboubakar.
Ku mugoroba wo kuri uyu wa Gatandatu, tariki ya 27 Mutarama 2024, ni bwo byatangajwe ko Umutoza w’Ikipe y’Umupira w’Amaguru y’Abakiri bato ya Etincelles FC witwa Bizimana Abdou yafunzwe.
Bekeni w’imyaka 63 akurikiranyweho icyaha cyo gukubita no gukomeretsa ku bushake Nsengiyumva Aboubakar w’imyaka 48.
- Advertisement -
Yamukubise umutwe mu gahanga aramukomeretsa ubwo bari bari kuri Stade Umuganda bari kwitegura umukino w’impande zombi. Imvururu zaturutse ku byo aba bagabo bombi batumvikanyeho.
Uwafashwe afungiye kuri Station ya RIB ya Gisenyi mu gihe dosiye igiye gutunganwa kugira ngo yohererezwe Ubushinjacyaha mu gihe cyagenwe n’Itegeko.
Icyaha cyo gukubita cyangwa gukomeretsa ku bushake ugihamijwe ahanishwa igifungo kuva ku myaka itatu ariko kitarenze itanu n’ihazabu yo kuva ku bihumbi 500 Frw ariko itarenze miliyoni 1 Frw.
