Bamporiki Edouard wahoze ari Umunyamabanga wa Leta muri Minisiteri y’Urubyiruko n’Umuco yatawe muri yombi, atangirira gukora ibihano muri Gereza ya Nyarugenge, nyuma yo guhamwa n’ibyaha byo Kwihesha ikintu cy’undi hakoreshejwe uburiganya no gukoresha mu nyungu ze bwite ububasha ahabwa n’itegeko.
Ni nyuma y’aho kuri uyu wa mbere taliki 23 Mutarama, yakatiwe igifungo cy’imyaka itanu n’ihazabu ya Miliyoni 30FRW nk’uko byatangajwe n’inteko y’urukiko rukuru rufite icyicaro gikuru i Nyamirambo mu Mujyi wa Kigali.
Dr. Murangira Thierry uvugira urwego rw’igihugu rw’ubugenzacyaha (RIB) yemeje ko Bwana Bamporiki yafungiwe muri Gereza ya Nyarugenge iri i Mageragere ku mugoroba wo ku ya 23 Mutarama 2023, kugira ngo hubahirizwe imyanzuro y’urukiko.
Bamporiki yari yabanje gukatirwa igifungo cy’imyaka 4 n’ihazabu ya Miliyoni 60FRW mu rukiko rwisumbuye rwa Nyarugenge mu Ukwakira 2022, ariko we ajurira asaba kuvanirwaho ibihano mu gihe Ubushinjacyaha nabwo bwajuriye buvuga ko yahawe ibihano bito.
- Advertisement -
Mu isomwa ry’urubanza mu rukiko rukuru, Inteko yavuze ko hahujwe ubujurire bw’impande zombi kugira ngo ziburane mu rubanza rumwe, ari narwo rwasize igifungo cya Bamporiki cyongerewe kikagera ku myaka 5 naho ihazabu ikagabanywaho Miliyoni 30Frw.
Urubanza rw’Ubujurire rwasomwe Bamporiki n’abamwunganira badahari, mu gihe Ubushinjacyaha bwo bwari buhagarariwe.
