APR FC yatsinze Marines FC mu mukino wa gishuti

APR FC imaze gukina imikino 10 mu mwaka mushya wa Shampiyona ariko umukino umwe wonyine yakinnye none ni wo yiteguriye nyuma yo gukina ibiri yo gutaha Stade Amahoro, imikino itanu muri CECAFA, umukino wa Simba Day ndetse n’imikino ibiri yahuriyemo na AZAM muri CAF Champions League.

Mu mukino wo kuri uyu munsi, APR FC yakoresheje abakinnyi bayo ifite kuri ubu, batarimo umunani bahamagawe mu ikipe y’igihugu Amavubi, Mamadou Sy na Pavelh Ndzila na bo bahamagawe n’amakipe y’ibihugu byabo, Kategeya Elie ushobora kwerekeza muri Mukura VS uyu munsi, Dauda Seidu waruhukijwe ndetse na Nshimirimana Ismael Pichou watandukanye n’iyi kipe.

Ibitego bya Tuyisenge Arsene mu gice cya mbere ndetse na Victor Mbaoma Chukuemeka kuri Penaliti mu gice cya kabiri ni byo byahaye intsinzi iyi kipe y’ingabo z’igihugu, aho impozamarira ya Marines FC na yo yaje gutsindwa na Usabimana Olivier kuri penaliti.

Ni umukino muri rusange umukinnyi mushya w’iyi kipe Johnson Nwobodo Chidiebere yigaragajemo, aho yaje gutanga umupira wavuyemo igitego cya Tuyisenge, mu gihe yanaremye amahirwe menshi mu kibuga yatumye abari i Shyorongi bibaza impamvu ari wo mukino wa mbere akiniye APR FC kuva yava muri Enugu Rangers yari abereye Kapiteni.

Undi mukinnyi wigaragaje kuri uyu mugoroba ni myugariro Aliou Souané wongeye guhamya impamvu na bagenzi be bibaza igituma atari yatangizwa mu kibuga.

Nyuma yo gutsinda Marines FC itari ifite umutoza Yves Rwasamanzi wajyanye n’Amavubi muri Libya, APR FC izongera kujya mu kibuga kuri uyu wa Kabiri tariki 3 Nzeri 2024 ihura na Mukura VS mu mukino uzabera kuri Kigali Pele Stadium.

Nzotanga Fils na Bacca wagiye mu kibuga asimbuye bacungiraga hafi umukinnyi wa Marines mu minota ya nyuma y’umukino.

Umunyezamu Ishimwe Pierre ni we wari wagiriwe icyizere kuri uyu munsi.

Kwitonda Alain Bacca utaherukaga mu kibuga yaje guhabwa iminota uyu munsi.

Usabimana Olivier yatsindiye Marines kuri Penaliti

Ishimwe Jean Rene uheruka kuva muri Marines yakinaga umukino we wa mbere muri APR FC.

Chairman wa APR FC Rtd Col Karasira Richard na we yari yaje gukurikirana uyu mukino.

Darko Nović ntabwo yanyuzwe n’uko ikipe ye yari iri gukina mu gice cya mbere.

Abafana ba APR FC bari baje kwihera amaso ikipe yabo.

Richmond Lamptey ni umwe mu bagiriwe icyizere cyo gutangira mu kibuga.

Godwin Odibo ntabwo we yigaragaje nka bagenzi be.