Kuri uyu wa mbere Minisitiri ushinzwe Polisi muri Afika y’Epfo yatangaje ko umugabo wari wemeye ko yishe abagore benshi mu cyaro cyo mu Ntara ya KwaZulu-Natal yiyahuriye muri kasho ya polisi.
Imibiri y’abo bagore bishwe hagati y’ukwezi kwa kane n’uku kwa munani yatoraguwe mu murima w’ibisheke, bakaba bari hagati y’imyaka 16 na 36, hari kandi abandi bagore bataramenyekana neza umubare baburiwe irengero, hanyuma indi ibiri y’abagore bishwe, ikaba iheruka kuboneka mu byumweru bibiri bishize.
![](https://umurengezi.com/wp-content/uploads/2020/08/Cele-300x300.jpg)
Kuri uyu wa mbere amagana y’abantu yagiye imbere y’urukiko yamagana ubwicanyi bwakorewe abagore batanu, bashaka no kureba abagabo babiri bafashwe bakekwa bakaba kandi barakajwe no kubwirwa ko ‘umwe mu bakekwa yiyahuriye muri kasho ya polisi’. Bamwe basabye ko berekwa umurambo we ngo babyemere.
![](https://umurengezi.com/wp-content/uploads/2020/08/Abigaragambya-300x225.jpg)
Ku wa gatanu washize ni bwo Polisi yo muri aka gace yafashe abagabo babiri bakurikiranyweho imfu z’aba bagore, kuri uyu wa mbere ni bwo bari kugezwa imbere y’ubushinjacyaha.
- Advertisement -
Ku wa gatandatu kandi Bheki Cele, Minisitiri wa Polisi yasuye iki cyaro yizeza abaturage ko polisi izaba iri maso kandi ko hagiye kujya hakorwa icungwa ry’umutekano na polisi ndentse n’abasanzwe bahatuye.
Minisitiri Bheki Cele yabwiye imbaga y’abigaragambya ko uwiyahuye yari yabanje kwemera icyaha, naho mugenzi we bafunganye ko yakubiswe bikomeye n’abafungwa bandi yasanze muri kasho.
Bwana Bheki Cele yabwiye abigaragambya ko bishoboka ko hari indi mibiri y’abagore itaraboneka.
Ni nyuma y’uko kuwa gatanu abagabo babiri bafashwe bakekwaho uruhare mu kwica abagore mu buryo butarasobanuka neza kugeza ubu.
Abatuye agace aba bagore biciwemo bavuga ko babaho mu bwoba kuko nta polisi iba hafi ngo ibacungire umutekano.
Ubwicanyi bwakorewe abo bagore bwari bwarateye urujijo n’ubwoba kuko ababicaga batazwi, bamwe bavugaga ko ari umwicanyi kabuhariwe cyangwa itsinda ry’abicanyi ribikora.
BBC Gahuza