Rwanda Premier League yatangaje ko imikino y’umunsi wa gatandatu, uwa karindwi n’uwa munani ya Shampiyona y’u Rwanda, yagizwe ibirarane kubera imikino y’Ikipe y’Igihugu ‘Amavubi’ mu majonjora ya CHAN 2024 na CAN 2025.
U Rwanda ruzahura na Djibouti mu majonjora y’ibanze ya Shampiyona Nyafurika ihuza abakinnyi bakina imbere mu gihugu, ndetse umukino ubanza uteganyijwe hagati ya tariki ya 25 na 27 Ukwakira 2024.
Ibi bivuze ko kubera imyiteguro y’uyu mukino, abakinnyi benshi bazaba bari mu Ikipe y’Igihugu, bityo bidashoboka ko shampiyona yari iteganyijwe hagati ya tariki ya 19-23 Ukwakira yakinwa.
- Advertisement -
Usibye imikino ya Shampiyona kandi hashoboraga kuba n’umukino w’ikirarane cy’Umunsi wa Gatatu wa Shampiyona kigahuza Rayon Sports na APR FC ku wa 19 Ukwakira, ariko na wo ntuzaba.
Amavubi aramutse yitwaye neza mu mikino ya Djibouti, yazahura n’izaba yatsinze hagati ya Sudani y’Epfo na Kenya, mu ijonjora rya kabiri riteganyijwe mu Ukuboza.
Imikino ya nyuma y’irushanwa rya CHAN 2024 izakinwa guhera tariki ya 1 kugeza 28 Gashyantare 2025.
Uretse iyi CHAN, kuba u Rwanda rufite imikino y’umunsi wa gatanu n’uwa gatandatu yo mu Itsinda D ryo gushaka itike ya CAN 2025 mu Ugushyingo, byatumye Shampiyona izasubukurwa tariki ya 22-24 Ugushyingo hakinwa Umunsi wa Cyenda.
