REG WBBC yatsinze APR WBBC amanota 71-63, yegukana Igikombe cya Shampiyona ya Basketball nyuma yo kubona intsinzi enye yasabwaga mu Mikino ya Kamarampaka (betPawa Playoffs).
Uyu mukino wa kane wabaye mu ijoro ryo ku wa Gatanu, tariki 11 Ukwakira 2024 muri Petit Stade.
Ni umukino REG WBBC yasabwaga gutsinda ikegukana igikombe cya Shampiyona.
- Advertisement -
Ni mu gihe APR yari yatsinzwe imikino itatu iheruka yari yazanye umuvuno mushya, aho Umutoza Mukuru, Mushumba Charles yahariye Nkulikiyinka Deo umwungirije atoza umukino cyane ko ari na we wari ufite iyi kipe muri Shampiyona isanzwe.
Ikipe y’Ingabo yatangiye umukino neza cyane, Ineza Sifa na Yoro Diakite bayitsindira amanota menshi. Agace ka mbere karangiye iyoboye umukino n’amanota 18 kuri 15 ya REG WBBC.
Ikipe ya Sosiyete y’Igihugu ishinzwe Ingufu yasubiranye imbaraga mu gace ka kabiri, Tetero Odile na Destiney Philoxy batsinda amanota menshi.
Aka gace kari kegeranye cyane, karangiye amakipe yombi anganya amanota 15-15, icyakora igice cya mbere cyarangiye APR WBBC iyoboye umukino n’amanota 33 kuri 30 ya REG WBBC.
Agace ka gatatu karimo imbaraga ku mpande zombi byatumaga karyoha. Tetero na Philoxy bakomeje gufasha REG cyane, mu gihe Sifa na Umugwaneza Charlotte babigenzaga uko ku rundi ruhande.
Ikipe ya Sosiyete y’Igihugu ishinzwe Ingufu yatsinze aka gace ku manota 19 kuri 13 y’Ikipe y’Ingabo. Muri rusange, agace ka gatatu karangiye REG WBBC yigaranzuye APR WBBC iyobora umukino n’amanota 49 kuri 46.
Mu gace ka nyuma, umukino warushijeho kuryoha, amakipe yombi akomeza kwegerana cyane mu manota. Habura iminota itatu, Micomyiza Rosine Cisse yatsinze amanota atatu inshuro ebyiri, yongera ikinyuranyo kiba amanota atanu (64-59).
Umukino warangiye REG WBBC yatsinze APR WBBC amanota 71-63, yegukana Igikombe cya Shampiyona nyuma yo kuzuza intsinzi enye ku busa.
Ni ku nshuro ya gatatu iyi kipe yegukanye Igikombe cya Shampiyona kuva yahindurwa ikava kuri Ubumwe WBBC ikaba REG WBBC. Ni igikombe cyiyongereye ku cya 2021 n’icya 2022.
Nyuma y’uyu mukino kandi hatanzwe ibihembo ku bahize abandi muri iyi shampiyona. Ku ikubitiro, Kristina King Morgan wa REG WBBC yabaye umukinnyi mwiza w’Imikino ya Kamarampaka, ahembwa miliyoni 2 Frw yahawe na betPawa.
Dusabe Jane wa The Hoops yabaye myugariro mwiza nyuma yo gukora ’blocks’ 38, ’steals’ 58, ’rebounds’ 327 n’amanota 343. Micomyiza Rosine Cisse wa REG WBBC yabaye uwatsinze amanota atatu menshi, aho yayatsinze inshuro 69.
Umukinnyi wazamuye urwego kurusha abandi (Most Improved Player) yabaye Uwimpuhwe Violette wa IPRC Huye.
Umutoza mwiza w’umwaka yabaye Byukusenge Xavier wa Groupe Scolaire Marie Reine Rwaza naho Nibishaka Brighitte aba umukinnyi mwiza wa Shampiyona isanzwe ndetse n’uwatsinze amanota menshi angana na 501.
