Phil Foden wa Manchester City yabaye umukinnyi w’umwaka, Cole Palmer aba umuto wahize abandi muri Shampiyona y’u Bwongereza
Foden yatsinze ibitego 19 mu mikino 35 yakinnye muri uyu mwaka anafasha Manchester City kwegukana Igikombe cya Shampiyona ku nshuro ya kane yikurikiranya.
Uyu mukinnyi yatsinze mugenzi we Erling Haaland na Rodri bakinana, Palmer, Martin Ødegaard na Ollie Watkins wa Aston Villa.
- Advertisement -
Nyuma yo kwegukana igihembo, Foden yavuze ko ari iby’agaciro gutorwa na bagenzi be.
Ati “Kwegukana iki gihembo ni ibintu byiza nishimira cyane. Guhabwa agaciro n’abakinnyi bagenzi bawe bisobanuye buri kimwe kandi ndashimira buri umwe wantoye.”
Cole Palmer yahembwe nk’umukinnyi mwiza ukiri muto, nyuma yo gutsinda ibitego 22 mu mikino 34 yakiniye Chelsea umwaka ushize.
Uyu mukinnyi w’imyaka 22 yahigitse Bukayo Saka wa Arsenal, Kobie Maino na Alejandro Garnacho ba Manchester United, Michael Olise wahoze muri Crystal Palace na João Pedro wa Brighton & Hove Albion.
Ikipe y’umwaka yiganjemo abakinnyi ba Arsenal na Manchester City n’ubundi zarwaniye igikombe kugera ku munsi wa nyuma.
Iyi kipe igizwe n’umunyezamu David Raya (Arsenal), myugariro ni William Saliba (Arsenal), Virgil van Dijk (Liverpool), Gabriel Magalhães (Arsenal) na Kyle Walker (Manchester City).
Abakina hagati ni Rodri (Manchester City), Declan Rice (Arsenal) na Martin Ødegaard (Arsenal). Ni mu gihe ba rutahizamu igizwe na Erling Haaland (Manchester City), Phil Foden (Manchester City) na Ollie Watkins (Aston Villa).
