Urayeneza John wari Perezida w’ikipe ya Gicumbi FC, yamaze gusezera kuri izo nshingano abitewe n’uko ngo ubuyobozi bw’aka Karere busa n’ubwatereranye ikipe.
Nk’uko bigaragara mu ibaruwa Urayeneza yandikiye ubuyobozi bw’Akarere ka Gicumbi kuri uyu wa 28 Gashyantare 2022, yavuze ko impamvu y’amikoro make iyi kipe ifite ari yo yabaye nyirabayazana y’ubwegure bwe.
Muri iyi baruwa kandi, Urayeneza yavuze ko azakomeza kuba hafi y’ikipe nk’uko byari bisanzwe na mbere yo kuba Umuyobozi wa yo.
Yagize ati, “Mbandikiye iyi barwa mpagarika inshingano zo kuyobora ikipe kubera ikibazo cy’ubushobozi ikipe ihabwa mbona butatuma itanga umusaruro nk’uko mbyifuza. Nzakomeza gutanga umusanzu wanjye muri siporo kandi nzayiba hafi nk’umukunzi wa yo.”
- Advertisement -
Urayeneza yasoje amenyesha inzego bireba zirimo Ishyirahamwe Nyarwanda ry’Umupira w’Amaguru(FERWAFA) na Komite Nyobozi y’iyi kipe.
Uyu mugabo yari yaragijwe iyi kipe n’abanyamuryango ba yo, muri 2018. Bivuze ko yari ayimazemo imyaka ine n’amezi abiri.
Gicumbi FC iri ku mwanya wa nyuma n’amanota 14 n’umwenda w’ibitego 17, mu gihe shampiyona yo izaba ikinwa imikino y’umunsi wa 20.
Uretse uyu muyobozi kandi warekuye inshingano yari afite, ku Cyumweru tariki 27 Gashyantare 2022, uwari umutoza mukuru wayo, Bienvenue Ghyslain Tchiamas mu kiganiro n’abanyamakuru nyuma yo kunyagirwa na Kiyovu Sports ibitego 6-0, yavuze ko nawe atakiri umutoza w’iyi kipe.
Urayeneza abaye uwa gatatu weguye ku mwanya w’ubuyobozi bw’ikipe kuva mu ntangiriro y’iyi shampiyona, nyuma ya Perezida wa Musanze, Tuyishimire Placide uzwi nka Trump ndetse na Kamuzinzi Godefroid wa Espoir FC, nabo bari beguye, gusa nyuma bakaza gutangaza ko bisubiyeho cyemezo bari bafashe.
Ibaruwa isezera Urayeneza yandikiye ubuyobozi bw’Akarere ka Gicumbi
