Ikipe ya Rayon Sports WFC yabonye itike ya ½ cy’Igikombe cy’Amahoro nyuma yo gusezerera APAER iyitsinze ibitego 3-1 ku mikino yombi.
Umukino wo kwishyura wa ¼ wabereye mu Nzove, ikipe ya Rayon yawukinnye ifite impamba y’igitego 1-0 yari yatsindiye muri APAER aho bitanasabye umwanya munini ngo iyi kipe ishimangire umwanya muri ½ cy’irangiza.
Ku munota wa kabiri wonyine, Nibagwire Libellée yafunguye amazamu yo mu Nzove mu gihe Mukandayisenga Jeanine uzwi nka Kaboyi yatsinze igitego cya kabiri byatumye iyi kipe itsinda ibitego 2-1 byasanze 1-0 cyo ku mukino ubanza biba ibitego 3-1.
- Advertisement -
Mu wundi mukino wa 1/4, ikipe ya AS Kigali yatsinze Nasho ibitego 2-0 byiyongera ku 10-0 yatsindiye kuri Kigali Pele Stadium biba urunganda rw’ibitego 12 ku busa cyangwa se urunganda.
Aya makipe yombi azahura mu mikino ibiri ya ½ aho azaba akina ku nshuro ya gatandatu kuva iyi kipe ya Rayon Sports yatangira gukina mu cyiciro cya kabiri mu mwaka wa shampiyona ushize.
Aya makipe yari yahuriye ku mukino wa nyuma w’Igikombe cy’Amahoro mu mwaka ushize aho AS Kigali yaje kucyegukana itsinze Rayon Sports kuri penaliti 3-2, nyuma y’uko amakipe yombi yari yanganyije igitego 1-1 mu minota 120 yakiniwe kuri Stade Mumena ku Cyumweru, tariki ya 21 Gicurasi 2023.
Aba kandi bongeye guhurira ku mukino w’igikombe kiruta ibindi, ubwo AS Kigali yaje gutsinda Rayon Sports igitego 1-0 ndetse iza no kuyisubira ku mukino w’Igikombe cy’Intwari.
Rayon Sports y’abagore ariko, ni yo yavuze ijambo rya nyuma muri Shampiyona y’Icyiciro cya mbere yaje no kwegukana, dore ko mu mikino ibiri bahuriyemo na mukeba AS Kigali, yatsinze umwe mu gihe undi bawunganyije.
Undi mukino wa kimwe cya kabiri uzahuza ikipe ya Fatima yasezereye Gasabo iyitsinze ibitego 3-2 mu mikino yombi n’Indahangarwa yasezereye Inyemera kuri penaliti esheshatu kuri eshanu nyuma yaho buri kipe itsindiye mu rugo igitego 1-0.
