Kubera gutinza gutangiza umukino inshuro nyinshi mu mikino ya Shampiyona y’u Bwongereza ndetse ikanabyemera, Manchester City yahanishijwe gucibwa amande y’arenga miliyoni 2.5$.
Mu mwaka ushize w’imikino Manchester City yagiye ihabwa umwanya wo gutangiza umukino, rimwe na rimwe abakinnyi bagatinda kuwutera ndetse ibindi bihe abakinnyi bagatinda kuva mu rwambariro byatumaga iminota y’umukino yiyongera.
Nk’uko Premier League ibitangaza, iyi kipe yabikoze inshuro 22 mu mwaka wose wa 2023/24 ndetse ntiyanatanga impamvu zifatika zituma ikunda gutangiza umukino yatinze ku masaha yateganyije.
- Advertisement -
Premier League yavuze ko nyuma yo guhabwa ibihano, Man City yemeye amakosa inisegura ivuga ko “isaba imbabazi ku kurenga ku mategeko ndetse yamaze no gutangariza abakinnyi n’abashinzwe ikipe ko bakwiye kwita kuri izo nshingano.”
Si ubwa mbere iciwe amande kuri aya makosa kuko mu 2022-23, yabikoze inshuro umunani bigatuma icibwa agera hafi ku bihumbi 500$.
Iyi kipe kandi iherutse kwegukana Shampiyona y’u Bwongereza inshuro enye zikurikiranya, iri gukorwaho iperereza ku byaha byo gukoresha umutungo nabi bidadakurikije amategeko kuva mu 2009.
