Ikipe ya APR FC yatsinze Musanze FC ibitego 3-1 mumukino w’umunsi wa 19 wa Shampiyona, ikomeza kongera ikinyuranyo cy’amanota ku makipe ayikurikira ku rutonde rw’agateganyo rwa shampiyona.
Uyu mukino wabaye kuri iki Cyumweru tariki 4 Gashyantare 2024, kuri Sitade Ubworoherane mu Karere ka Musanze.
Mu mukino uryoheye ijisho amakipe yombi yatangiye asatirana ku mpande zombi ariko Musanze FC ikirahira umupira cyane.
- Advertisement -
Ku munota wa Gatatu Musanze yabonye uburyo bw’igitego ku mupira Solomon Adeyinka yakinanye na Lethabo Mathaba wahinduye umupira mu rubuga rw’amahina, ufatwa neza n’umunyezamu Pavelh Ndzila.
APR FC na yo yabonye uburyo bwo gufungura amazamu ku mupira Omborenfga Fitina yahinduye usanga Niyibizi Ramadhan, ateye ishoti rijya hejuru y’izamu.
Iminota 30 ya mbere y’umukino amakipe yombi yakiniraga hagati mu kibuga kubera imiterere y’ikibuga.
Ku munota wa 35 APR FC yabonye uburyo bukomeye bwo gufungura amazamu ku mupira mwiza Solomon Adeyinka yabonye mu rubuga rw’amahina, arawufunga, ashatse kuwutera mu izamu ahangana na Yunussu na Omborenga mbere y’uko Ndzila awukoraho ujya muri koruneri itagize icyo itanga.
Muri iyi minota Musanze yarushije cyane APR FC binyuze kuri Lethabo Mathaba wari wazonze ba myugariro ba Musanze FC ariko bakomeza kwihagararaho.
Mbere y’uko igice cya mbere kirangira Musanze yongeye kubona amahirwe yo gutsinda igitego ku mupira Kokoete Udo yateye Niyigena Clement, aritambika umupira w’amukuramo.
Igice cya mbere cyarangiye amakipe yombi anganyije ubusa ku busa
Mu gice cya kabiri ku munota wa 50, Musanze yabonye amahirwe yo gutsinda igitego ku mupira Sulley Mohamed yateye uteretse, ukurwamo n’umunyezamu Pavelh Ndzila.
Ku munota wa 69 APR FC yarushwaga muri iyi minota yabonye uburyo bwo gufungura amazamu ku mupira Bacca yahaye Omborenga uwuhinduye mu rubuga rw’amahina, usanga Ruboneka uwushyizeho umutwe, ariko Niyomugabo awutera ku ruhande.
Ku munota wa 79 APR FC yafunguye amazamu ku mupira Ruboneka yahinduye mu ruhande rw’ibumoso usanga Bacca wari wunamye, awushyira mu izamu n’umutwe.
Nyuma y’iminota ibiri gusa ku munota wa 81, Musanze FC yahise yishyura igitego ku mupira wazamukanywe na Kwizera Tresor, utsindwa na Lethabo Mathaba.
Ku munota wa 84 APR FC yatsinze igitego cya kabiri ku mupira uteretse watewe na Bacca ukorwaho na Omborenga Fitina mbere y’uko ugora Umunyezamu Muhawenayo wari ugerageje kuwurenza izamu.
Ku munota wa 89 Musanze yananiwe kwishyura igitego ku mupira Solomon Adeyinka yananiwe kuroba Umunyezamu Ndzila wasohotse ntafate umupira, ariko awuhinduye mu izamu, mugenzi we ashyizeho umutwe usanga umunyezamu wa APR FC uwukoraho mbere y’uko Nshimiyimana Yunussu akiza izamu.
Mbere y’uko umukino urangira Umusifuzi wa Kane yongeyeho iminota itatu.
Ku munota wa 90+3 APR FC yatsinze igitego cya gatatu ku mupira winjiranywe na Bacca ku ruhande rw’iburyo, awuha Mbonyumwami Thaiba ashyira mu izamu.
Umukino warangiye APR FC itsinze Musanze Ibitego 3-1 ku munsi wa 19 wa shampiyona, igira amanota 39 ku mwanya wa mbere.
Musanze FC yagumye ku mwanya wa Kabiri n’amanota 33.
Police FC iri ku mwanya wa gatatu n’amanota 32 nyuma yo kunganya na Etincelles FC igitego 1-1
kuri iki Cyumweru.
Undi mukino wabaye kuri iki Cyumweru warangiye Muhazi United itsinzwe n’Amagaju FC ibitego 2-1.
